Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 211 Hüküm no: 156 Orijinal metin no: [104-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kağıthane Camii imamı Seyyid Mehmed Nureddin Efendi’nin yerine Seyyid Hafız Ali Efendi’yi vekil tayin ettiği Ali, nasb-ı vekîl Numara: 264, harcı: 40 guruş Havâss-ı Refî‘a kazâsına tâbi‘ Kâğıdhâne karyesi câmi‘-i şerîfinin imâmı es-Seyyid Hafız Mehmed Nureddin Efendi b. es-Seyyid Hafız Mustafa b. Hamza mahmiye-i İstanbul’da Eğrikapı kurbünde Avcıbey mahallesinde sâkin işbu bâ‘isü’l-kitâb es-Seyyid Hafız Ali Efendi b. es-Seyyid Mustafa b. Osman mahzarında ikrâr ve takrîr-i kelâm edüp Nezâret-i Evkāf-ı hümâyûna mülhak evkāfdan merhûme Dâye Hatun Vakfı’ndan almak üzere şehrî cem‘an yetmiş guruş vazîfe ile câmi‘-i şerîf-i mezkûrun imâmet ve hitâbet cihetleri benim bâ-berât-ı âlî uhdemde olup ancak ahâli-i karyeden ba‘zıları ile beynimizde zuhûr eden adem-i imtizâcdan dolayı hakkımda bâ-arzuhâl iştikâlarına mebnî ciheteyn-i mezkûreteyn hizmetlerini hüsn-i îfâ etmek üzere tarafımdan müntahab-ı ahâli olup lede’l-imtihân ehliyeti zâhir olan mûmâ-ileyh Hafız Ali Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl ve hizmet-i lâzımelerini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 12 Rebî‘ülâhir sene [1]301 Şühûdü’l-hâl: Muhtâr-ı evvel Edhem Ağa b. Ahmed, muhtâr-ı sânî Mustafa Efendi b. Osman, Muhzır Ömer Ağa b. Abdulkadir ve gayruhum.