Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 212 Hüküm no: 157 Orijinal metin no: [104-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Râşid Ağa’nın vefatıyla oğluna kalan evin satılmasına izin verilmesi İbrahim, izin: 1 kıt‘a Numara: 312, 3 guruş Mahmiye-i İstanbul’da Kıztaşı kurbünde Hasan Halîfe mahallesinde sâkin iken bundan akdem vefât eden bezzâzistân münâdîlerinden Mehmed Râşid Ağa b. Mehmed’in sulbî sagīr oğlu İsmail Hakkı’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı mahalle-i mezkûrede sâkin haffâf esnâfından Abdulkadir Ağa b. Abdurrahman b. Abdulkadir Saraçhâne kurbünde Kızıl Minâre mahallesinde sâkin mahalle-i mezkûre imâmı vekîli Hafız Müslim Efendi b. el-Hâc Yakub ta‘rîfleriyle mu‘arrefe Hadice Hanım bt. Mehmed Ali b. Abdullah bi’l-vesâye takrîr-i kelâm edüp hudâvendigâr-ı esbak cennet-mekân Sultan Ahmed Hân-ı evvel -tâbe serâhû- hazretlerinin evkāf-ı şerîfeleri müsakkafâtından mahalle-i mezkûrede kâin on numara ile murakkam ma‘lûmü’l-hudûd ve’l-müştemilât şehriye doksan akçe icâre-i müeccelelü bir bâb menzilin rub‘ hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīre-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan rub‘ hissesi bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun rub‘ hisse-i şâyi‘ası menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla dört bin guruş mukābelesinde bâ-re’y-i mütevellî âhara ferâğa izin taleb şüd. Fî 2 Ca sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere vasîyy-i mezbûre Hadice Hanım sagīr-i mezbûrun menzil-i mezkûrda olan rub‘ hisse-i şâyi‘ası bedel-i misli idiği mütehakkık olan lira-yı Osmânî yüz guruş hesâbıyla dört bin guruş mukābelesinde Muhzır Refîkı Mustafa Ağa’ya ol dahi ol-mikdâr bedel ile meblağ-ı merkūm mukābelesinde vasîyy-i mezbûre Hadice Hanım’a bâ-re’y-i mütevellî kat‘iyyen ferâğ ve tefvîzleri ba‘de’l-icrâ vasîyy-i mezbûre Hadice Hanım vasîsi olduğu oğlu sagīr-i mezbûrun mâlından ve li-ecli’l-istidâne vasî nasb olunan mezbûr Hasan Ağa yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla dört bin guruş deyni mukābelesinde rub‘ hisse-i şâyi‘a-yı mezkûru sagīr-i mezbûra vefâen ferâğ ve tefvîz eylediğinden ol-vechile Senedât-ı Umûmiye İdâresi’nden ferâğları icrâ olunmak üzere işbu mahalle şerh verildi. Fî 20 Şa‘bân sene [1]301