Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 213 Hüküm no: 158 Orijinal metin no: [105-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musâhib-i şehriyârî Şemseddin Ağa’nın vakfiyesi Musâhib-i hazret-i şehriyârî esbak Şemseddin Ağa’nın vakfiyesidir Mümeyyiz-i Evvel Efendi Numara: 206, 347 guruş Uhbirtü bimâ-fîhi ve neffeztü mâ-yahvîhi min-asli’l-vakf ve’ş-şurût ale-’n-nemati’l-mebsût ve ene’l-fakīr ilâ âlâi Rabbihi’l-Kadîr Bedreddin Efendizâde Ahmed Muhtâr el-müfettişü li-umûri’l-evkāf -gufire lehümâ- El-hamdü lillâhi Rabbi’l-âlemîn ve’l-âkıbeti li’l-müttekīn ve’s-salâtü ve’s-selâmü alâ-rasûlihî Muhammedin ve alâ-âlihî ve sahbihî ecma‘în. Ammâ ba‘d işbu kitâb-ı sıhhat-nisâbın tahrîr ve inşâsına bâ‘is ve bâdî oldur ki, işbu mücelled vakfiye ma‘mûlün-bihâ ve zeyllerinde muharrer vakf-ı şerîfin vâkıfı Dârü’s-saâdeti’ş-şerîfe ağası esbak merhûm Hafız İsa Ağa’nın acemîsinin acemîsi ve vakf-ı müşârün-ileyhin bi’l-meşrûta mütevellîsi olup devletlü necâbetlü Şehzâde Kemaleddin Efendi hazretlerinin dâire-i devletlerinde bulunan musâhib-i şehriyârî esbak Şemseddin Ağa b. Abdullah b. Abdülmennan savb-ı şer‘-i enverden me’zûnen ta‘yîn ve irsâl olunan Mümeyyiz-i evvel Mevlana İbrahim Âsım Efendi’nin Beşiktaş sâhilsaray-ı hümâyûnda vâki‘ Harem-i hümâyûn Agavâtı Evkāfı İdâresi içün teşekkül eden cem‘iyete mahsûs odada Teftîş-i Evkāf Mahkemesi Müsteşârı mevâlî-i fihâmdan Benlizâde fazîletlü es-Seyyid Mehmed Muhyiddin Efendi hâzır oldukları hâlde huzûr-ı Müslimînde akd eylediği meclis-i şer‘-i şerîf-i lâzımü’t-teşrîfde zikri âtî vakfa li-ecli’t-tescîl mütevellî nasb ü ta‘yîn olunan Harem-i hümâyûn Agavâtı Evkāfı’nın bâ-hüccet-i şer‘iye mütevellîsi el-Hâc Mustafa Efendi b. el-Hâc Ahmed mahzarında ikrâr-ı tam ve takrîr-i kelâm edüp vâkıf-ı müşârün-ileyh Hafız İsa Ağa Vakfı’nın ber-mûceb-i zeyl-i vakfiye akāra tebdîli meşrûta nukūd-ı mevkūfesinden yirmi beş bin guruş semen-i misliyle bi’l-izni’ş-şer‘î bi’t-tevliye iştirâ eylediğim Kartal kazâsında vâki‘ bir tarafdan Edhem Ağa bağçesi ve bir tarafdan Vasilaki bağı ve bir tarafdan Kara Osmanoğlu Ali tarlası ve bir tarafdan el-Hâc Abdi tarlası ile mahdûd tahmînen yirmi dönüm arâzi-i mîriye üzerinde mebnî ve mağrûs iki aded dolablı kuyu ve çend aded bağçevân odası ve eşcâr-ı müsmireyi hâvî tarafeyni taş duvar ile muhâta bi’l-cümle ebniye ve eşcârı mülk bir kıt‘a sebze bağçesini beher sene bâ-yed-i mütevellî icâre-i vâhide-i misliye-i sahîha-i şer‘iye ile tâlibine îcâr ve icâresi vâkıf-ı müşârün-ileyh Hafız İsa Ağa’nın evkāf-ı sâbıkāsı gallâtına zam ve ilâve olunarak derûn-ı vakfiye ve zeyllerinde olan hayrâtının mesârifine harc <>ü sarf olunmak üzere vakf-ı sahîh-i müebbed ve habs-i sarîh-i muhalled ile vakf ve habs ve mütevellî-i mûmâ-ileyhe teslîm eylediğimde ol dahi tesellüm ve kabûl ve sâir evkāf-ı mütevellîlerinin tasarrufları misillü tasarruf eyledi dedikde gıbbe’t-tasdîk-i vâkıf mütevellî-i mûmâ-ileyh vakf-ı mezkûrdan rücû‘ ile mevkūf-ı mezkûru mülkiyet üzere istirdâd ve mütevellî-i mûmâ-ileyh el-Hâc Mustafa Efendi red ve teslîmden imtinâ‘ ile kemâ-hüve’l-mastûr fi’l-kütübi’l-fıkhiyye müterâfi‘ân ve her biri mübtegāsınca fasl ü sulhe tâlibân olduklarında mümeyyiz-i evvel-i mûmâ-ileyh dahi tarafeynin kelâmına nazar ve mennâ‘un li’l-hayr olmakdan hazer edüp âlimen bi’l-hilâfi beyne’l-eimmeti’l-eslâf alâ-kavli men-yerâhu vakf-ı mezbûrun sıhhat ve lüzûmuna hükm-i sahîh-i şer‘î eylediğini mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîri tenfîz olunmağın vakf-ı mezbûr sahîh ve lâzım olup min-ba‘d nakz ve ibtâli muhâl oldu. Cerâ zâlike ve hurrire fi’l-yevmi’s-sâlis ve’l-ışrîn min-şehri Muharremi’l-harâm li-sene ihdâ ve selâse mi’ete ve elf. Şühûdü’l-hâl: Saray-ı hümâyûn Kandilcisibaşısı Hüseyin Tevfik Efendi b. Abdulkadir, Harem-i hümâyûn Agavâtı Evkāfı İdâresi a‘zâsından Mustafa Fevzi Efendi b. İbrahim, A‘zâ-yı merkūmeden el-Hâc Osman Ağa b. el-Hâc Mehmed, A‘zâ-yı merkūmeden Mehmed Ataullah Efendi b. Abdurrahman ve gayruhum.