Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 214 Hüküm no: 159 Orijinal metin no: [105-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürekçi Mıgırdıç’ın ölümüyle vârislerine kalan ev ve bahçenin satılmasına izin verilmesi Mahmiye-i İstanbul’da Koska kurbünde Şeyh Ferhad mahallesinde sâkin iken bundan akdem fevt olan teba‘a-i Devlet-i aliyyenin Ermeni milletinden Kürekçi Mıgırdıç v. İstefan’ın sulbî kebîr oğlu gayr-ı reşîd Simon’un zevcesi ve hâl-i sahvına değin emvâlini hıfz ve umûrunu rü’yete bâ-i‘lâm-ı şer‘î vasîyy-i mansûbesi Aranik Kadın bt. Agop’un li-ebeveyn karındaşı ve tarafından husûs-ı âtîde vekîl olduğunu şahs-ı merkūmeyi bi’l-ma‘rifeti’ş-şer‘iye ârifân teba‘a-i merkūmenin Rum milletinden Nikoli v. Vale ve yine teba‘a-i merkūmenin Ermeni milletinden Câbî Avakim v. Kirkor v. Sirobe haberleriyle zâhir olan teba‘a-i merkūmenin <> Ermeni milletinden işbu bâ‘isü’s-sifr Mardıros müteveffâ-yı merkūmun diğer sulbî kebîr oğlu olup yine mahalle-i mezbûrede sâkin iken bundan akdem fevt olan Ohannes’in sulbiye sagīr oğlu Agop’un anası ve tesviye-i umûruna bâ-hüccet-i şer‘iye vasîyy-i mansûbesi şahsı mu‘arrifân-ı merkūmân ta‘rîfleriyle mu‘arrefe olan teba‘a-i devlet-i merkūme nisvânından Verohil Kadın bt. Ohannes hâzır olduğu hâlde bi’l-vekâle takrîr-i kelâm edüp Nezâret-i Evkāf-ı hümâyûna mülhak evkāfdan Manisa kādısı merhûm Halil Efendi Vakfı müsakkafâtından mahalle-i mezkûrede Havuzlu Hamam nezdinde on dört numara ile murakkam ma‘lûmü’l-hudûd ve’l-müştemilât üç kıt‘a [106] temessükle şehriye doksan akçe icâre-i müeccelelü mukaddemâ arsa el-yevm bir bâb menzil ve bağçe müteveffâ-yı evvel merkūm Mıgırdıç’ın sağlığında bi’l-icâreteyn taht-ı tasarrufunda olup ba‘de vefâtihî gayr-ı reşîd merkūm Simon ve müteveffâ-yı merkūm Ohannes ile diğer sulbî kebîr oğulları İstefan ve Bartom ve sulbiye kızı Nakdihi’ye hasbe’l-âde ihmâsen ba‘de’l-intikāl merkūm Ohannes’in dahi mu‘ahharan fevtiyle hums hissesi sagīr-i merkūm Agop ile sulbî kebîr oğlu Mihran ve sulbiye kebîre kızı Ana’ya hasbe’l-âde islâsen intikāl edüp lâkin menzil-i mezkûrdan kibâr-ı merkūmûn hisselerini âhara ferâğ edeceklerinden gayr-ı reşîd ve sagīr-i merkūmânın hisselerinin nef‘ verir sûretde ifrâzı mümkün olmayıp bekāsı gayr-ı reşîd ve sagīr-i merkūmân haklarında muzır ve gayr-ı nâfi‘ olduğundan mâ‘adâ gayr-ı reşîd ve sagīr-i merkūmânın nafaka ve kisveye dahi eşedd-i ihtiyâcları olmağla gayr-ı reşîd ve sagīr-i merkūmânın menzil ve bağçe-i mezkûrlarda olan hisse-i şâyi‘a-i mezkûreleri kibâr-ı merkūmûn hissesiyle ma‘an bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak gayr-ı reşîd ve sagīr-i merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca gayr-ı reşîd ve sagīr-i merkūmânın menzil ve bağçe-i mezkûrlarda olan hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla gayr-ı reşîd merkūmun hums hisse-i şâyi‘ası iki bin guruş ve sagīr-i merkūmun humsdan sülüs hisse-i şâyi‘ası altı yüz altmış altı buçuk guruş ki cem‘an iki bin altı yüz altmış altı buçuk guruş mukābelesinde âhara ferâğa izin taleb şüd. Fî 27 Rebî‘ülâhir sene [1]301