Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 216 Hüküm no: 160 Orijinal metin no: [106-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum milletinden Vasiliki’ye ait olup Vasil’in emaneten elinde bulundurduğu kahve dükkânı ve âletlerinin vekâleti sebebiyle Nikola’ya verilmesi Kādızâde Mehmed, vekâlet: 1 kıt‘a Vilâyet-i Rumeli’de Nasliç kazâsına tâbi‘ Kostaviçko karyesinde sâkine teba‘a-i Devlet-i aliyyenin Rum milleti nisvânından Vasiliki bt. el-müteveffâ Haci Kosti v. Tanaş’ın zevci olup tarafından ber-vech-i âtî vekâlet iddi‘â eden teba‘a-i merkūmeden işbu bâ‘isü’s-sifr Nikola v. Yorgi v. Atam zikri âtî kahve dükkânı ve gedik âlâtı hisselerine bi’l-emâne vaz‘-ı yedi mütehakkık olan kezâlik teba‘a-i merkūmeden Vasil v. Dimitri v. Atam muvâcehesinde üzerine da‘vâ ve takrîr-i kelâm edüp Hazîne-i Haremeyn-i muhteremeynden mazbût evkāfdan Ayasofya-i kebîr Câmi‘-i şerîfi Evkāfı müsakkafâtından İstanbul’da Atpazarı kurbünde Manisalı Mehmedpaşa mahallesinde Fırın sokağında vâki‘ ma‘lûmü’l-hudûd ve’l-müştemilât iki temessük mantûklarında şehriye altmış akçe icâre-i müeccelelü otuz bir numara ile murakkam bir bâb kahve dükkânının nısf hissesi ve dükkân-ı mezkûr derûnunda mevcûde Hazîne-i Haremeyn-i muhteremeyn Evkāfı müstegallâtından gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla yevmî iki akçe icârelü altmış sehm hissesi babası müteveffâ-yı merkūm Haci Kosti intikālinden gāibe-i merkūme ile li-ebeveyn karındaşı gāib ani’l-meclis Yorgi’nin münâsafeten iştirâken ve şâyi‘an taht-ı tasarruflarında olup merkūm Vasil dükkân ve âlât-ı gedik-i mezkûrlardan gāibe-i merkūmenin rub‘ hisse-i şâyi‘asına gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer intikālen mutasarrıfe olduğu rub‘ hisse-i şâyi‘aları merkūmun yedinden nez‘ birle ahz ü kabza ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedelleri ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Şevvâli’l-mükerreminin beşinci günü târihiyle müverraha kazâ-i mezkûr nâibi Süleyman Hilmi Efendi’nin imzâ ve mutâbık hâtemini hâviye bir kıt‘a vekâlet hücceti ve hüccet-i mezkûre zahrında muharrer kazâ-i mezkûr bidâyet mahkemesinin memhûr mazbatası mûceblerince karye-i mezkûrede vâki‘ Vasil v. Yorgi’nin menzilinde nâib-i mûmâ-ileyh tarafından irsâl olunan Kâtib Hüseyin Hüsnü Efendi’nin akd eylediği m[eclis-i] şer‘de tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve vech-i lâyıkıyla bana teslîme merkūm Vasil’e tenbîh olunmak bi’l-vekâle matlûbumdur dedikde gıbbe’s-suâl merkūm Vasil cevâbında hisse-i mezkûreleri gāibe-i merkūmenin ber-vech-i muharrer tasarrufunda olup kendisi dahi teslîmle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle zikr olunan hüccet ve mazbata mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhânede ketb ü temhîr olunduğu ve mazmûnu müdde‘î-i merkūmun takrîr-i meşrûhuna [107] muvâfık bulunduğu ve mazbata-i mezkûre dahi hüccet-i mezkûreyi musaddık ve müeyyid olarak tezvîr ve tasnî‘den sâlim idiği münfehim ve Mecelle-i Ahkâm-ı Adliyye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince müdde‘î-i merkūmun vekâletine ba‘de’l-hükm rub‘ hisse vekâlet ve âlât-ı gedik-i mezkûrlardan keff-i yed ve vech-i lâyıkıyla müdde‘î-i vekîl-i merkūm Nikola’ya teslîme merkūm Vasil’e tenbîh olunmağın mâ-vaka‘a bi’t-taleb ketb olundu. Fî 7 Cemâziyelevvel sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.