Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 217 Hüküm no: 161 Orijinal metin no: [107-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni milletinden Harub ve Maryem’e ait olup Hamparsum’un emaneten elinde bulundurduğu aşçı dükkânındaki gedik âletlerinin vekâleti sebebiyle Nikola’ya verilmesi Aziz Efendi, isbât-ı vekâlet: 1 kıt‘a Numara: 325, harcı: 40 guruş Erzincan sancağına tâbi‘ Kuruçay kazâsı kurâsından Armudan-ı kebîr karyesinde mütemekkineler her biri Devlet-i aliyye teba‘asının Ermeni milleti nisvânından Harub bt. Nazaret v. Atam ve sadriye kebîre kızı Maryem bt. Ekmekçi Mardıros v. Kirkor tarafından ber-vech-i âtî vekâlet iddi‘â eden teba‘a-i Devlet-i aliyyeden ve millet-i merkūmeden işbu hâmilü’r-rakīm Ekmekçi Sahak v. Margos v. Kirkor zikri âtî gedik âlâtı hissesine bi’l-emâne vaz‘-ı yedi mütehakkık olan yine teba‘a-i Devlet-i aliyyeden ve millet-i merkūmeden Hamparsum v. Kigork v. Hamparsum mahzarında üzerine da‘vâ ve takrîr-i kelâm edüp İstanbul’da Uzun Çarşı kurbünde Mercan Ağa mahallesinde Tabakçılar caddesinde Yaldızlı Han karşısında Yolukcuk? Hanı derûnunda vâki‘ ma‘lûmü’l-hudûd altmış iki numara ile murakkam bir bâb aşçı dükkânı derûnunda mevcûde cennet-mekân Sultan Mahmud Hân-ı sânî -tâbe serâhû- hazretlerinin evkāf-ı şerîfeleri müstegallâtından beyne’l-esnâf gedik ta‘bîr olunur yevmî üç akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla on beş sehmi gāibe-i merkūme Harub’un bâ-temessük ve on beş sehmi dahi gāibe-i merkūme Maryem’in babası müteveffâ Ekmekçi Mardıros intikālinden kızı gāibe-i merkūme Maryem ile diğer sulbî kebîr oğulları Der-aliyye’de mütemekkinler teba‘a-i Devlet-i aliyye’den ve millet-i merkūmeden Mikâil ve Kigork’un âdiyen bi’l-icâreteyn taht-ı tasarruflarında ve merkūm Hamparsum hisse-i mezkûreye gāibetân-ı merkūmetânın teslîmleriyle bi’l-emâne vâzı‘ü’l-yed olup ancak gāibetân-ı merkūmetân Harub ve Maryem âlât-ı gedik-i mezkûrdan ber-vech-i muharrer mutasarrıfe oldukları yirmi sehm hisselerini merkūm Hamparsum’un yedinden nez‘ ü kabza ve ba‘de’l-kabz bedel-i misliyle gāibe-i merkūme Maryem’in karındaşları merkūmân Mikâil ve Kigork’a bâ-re’y-i mütevellî ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine işbu yedimde olup sene-i sâbıkā Saferi’l-hayrının on beşinci günü târihiyle müverraha kazâ-i mezkûr nâibi es-Seyyid Hafız Halil Fethi Efendi’nin imzâ ve mutâbık hâtemini hâviye bir kıt‘a vekâlet hücceti nâtıka olduğu üzere târih-i mezkûrda kazâ-i mezkûr mahkemesinde nâib-i mûmâ-ileyh huzûrunda şühûd muvâcehesinde taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûreden keff-i yed ve bana teslîme merkūm Hamparsum’a tenbîh olunmak murâdımdır deyü hüccet-i mezkûreyi ibrâz ile da‘vâ etdikde ol dahi cevâbında hisse-i mezkûre gāibetân-ı merkūmetânın bi’l-icâreteyn tasarruflarında olup kendisi dahi bi’l-emâne vâzı‘ü’l-yed olduğunu ikrâr ve müdde‘î-i merkūmun vekâlet müdde‘âsını inkâr edicek müdde‘î-i merkūmdan ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Nasârâdan ve kazâ-i mezkûr ahâlisinden olup bu esnâda Der-aliyye’ye gelen teba‘a-i Devlet-i aliyyeden ve millet-i merkūmeden gāibetân-ı merkūmetânın şahıslarını bilir her biri semerci esnâfından Serkiz v. Marat v. Atam ve Begos v. Matos v. Begos nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı merkūmân semerci esnâfı kethudâsı Melkon v. Arakil v. Kasbar ve esnâf-ı mezkûreden Makar v. Sebuh v. Atam ve Kirkor v. Avakim v. Azbazar ve Mûytâb Hüsnü Ağa b. Abdullah b. Abdurrahman’dan evvelâ bâ-varaka-i mestûre sırran ve ba‘dehû Mûytâb Osman Efendi b. Abdullah b. Ahmed ve Salih Efendi b. Mehmed Tosun b. Abdullah ile Semerci Kirkor v. Niyali v. Harar ve Abraham v. İgiya v. Tasos nâm kimesnelerden dahi alenen lede’t-tezkiye adl ve makbûlü’ş-şehâde idikleri tahrîr ve ihbâr olunmağın mûcebince hisse-i mezkûreden keff-i yed ve müdde‘î-i vekîl-i merkūm Sahak’a teslîme merkūm Hamparsum’a tenbîh olunmağın mâ-vaka‘a bi’t-taleb ketb olundu. Fî 11 Ca sene [1]301 Şühûdü’l-hâl: Ömer Ağa b. Mehmed Ağa b. Kadri ve gayruhum.