Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 219 Hüküm no: 162 Orijinal metin no: [108-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Bedriye Hanım’ın vefatıyla kızına kalan arsanın satılmasına izin verilmesi Hüsnü, izin: 1 kıt‘a Numara: 323, 210 guruş Galata’ya muzâfe kasaba-i Kasım Paşa’da Yahya Kethudâ mahallesinde sâkine iken bundan akdem vefât eden Fatıma Bedriye Hanım bt. Hüseyin’in sadriye sagīre kızı Vasfiye’nin babası ve velîsi olup mahmûdü’l-hâl idiği ihbâr olunan işbu bâ‘isü’l-kitâb Ali Efendi b. Mehmed bi’l-velâye takrîr-i kelâm edüp Nezâret-i Evkāf-ı hümâyûna mülhak evkāfdan merhûm Ahîçelebi Vakfı musakkafâtından mahalle-i mezkûrede Bostan sokağında vâki‘ iki numara ile murakkam şehriye kırk akçe icâre-i müeccelelü müfrez bir kıt‘a arsanın on sekiz sehm i‘tibârıyla bir sehm hisse-i şâyi‘ası müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sagīre-i mezbûreye hasbe’l-âde intikāl edüp lâkin arsa-i mezkûrenin etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olduğu zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olmağla sagīre-i mezbûrenin arsa-i mezkûrede olan bir sehm hisse-i şâyi‘a-i mezkûresi bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffât-ı mezbûrenin Teftîş-i Evkāf Mahkemesi’nden tahrîr olunan terekesi defter-i kassâm zeyline idhâl birle i‘mâl ve istirbâh olunup hâsıl olan nemâsıyla ma‘an hıfz olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup Altıncı Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca hisse-i şâyi‘a-i mezkûre bundan akdem lede’l-müzâyede ve ba‘de’l-keşf el-yevm bedel-i misli idiği mütehakkık olan lira-yı Osmânî yüz guruş hesâbıyla dört yüz kırk dört guruş on sekiz para mukābelesinde bâ-re’y-i mütevellî âhara ferâğa izin taleb şüd. Fî 3 Ca sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa ve gayruhum.