Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 121 Hüküm no: 51 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha ve Fâtıma’nın ortak evlerini Mehmed Beşe b. Mehmed’e bey‘ bi’listiğlâl yoluyla sattıkları ve kiraladıkları Mahmiye-i İstanbul’da Çerâğī Hamza mahallesi sâkinelerinden Sâliha ve Fâtıma bintey Mehmed nâm hâtunlar mahfil-i kazâda işbu bâ‘isü’l-kitâb Mehmed Beşe b. Mehmed nâm kimesne mahzarında her biri ikrâr ve takrîr-i kelâm edip akd-i âtî sudûruna değin ale’l-iştirâki’s-seviy yedimizde mülk ve hakkımız olup mahalle-i mezbûrede vâki‘ bir tarafdan balcı Solak Mehmed Çelebi mülkü ve bir tarafdan Abdullah Çelebi b. Abdullah mülkü ve bir tarafdan mahalle-i mezbûre mescidi ve bir tarafdan tarîk-i âm ile mahdûd dâhiliyyesinde fevkānî ve tahtânî büyût-ı adîdeyi müştemil menzilimiz cemî‘ tevâbi‘ ve levâhıkı ile mezbûr Mehmed Beşe[’ye] bi tarîki’l-istiğlâl yüz seksen esedî guruşa bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr yüz seksen esedî guruşu babamız merkūm Mehmed’in mezbûr Mehmed Beşe’ye cihet-i karzdan deyni olan yüz seksen esedî guruşa takās edip mezbûr Mehmed Beşe dahi mukāssa ve kabûl eyledikden sonra yine menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç yüz altmış gün tamâmına değin yirmi yedi esedî guruşa bize îcâr ve teslîm biz dahi vech-i muharrer üzre istîcâr ve kabûl ve kabz ve tesellüm eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Es-Seyyid Mehmed Çelebi, Mahmud Bey el-Cündî, Mustafa Bey, İvaz Bey, İbrahim Çelebi.