Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 219 Hüküm no: 163 Orijinal metin no: [108-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa’nın oğlu İsmail Hakkı’ya nafaka tayini Hocazâde Ali Rıza, nafaka Bilâ-harc Hudâvendigâr-ı esbak cennet-mekân Sultan Ahmed Hân-ı sâlis -tâbe serâhû- hazretlerinin evkāf-ı şerîfeleri müstegallâtından olan Bebek karyesinde bir bâb menzilde eşyâsı olup tebdîl-i hava zımnında İzmid’de sâkin iken bundan akdem vefât eden Suriye Kapı Kethudâsı Tevfik Bey’in Dâire Müdîri Mehmed Ağa’nın sulbî sagīr oğlu İsmail Hakkı’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi Fatıma Melek Hanım bt. Abdullah’ın hâlâ zevci ve tarafından umûr-ı vesâyeti vekîl-i müseccel-i şer‘îsi Mâliye Hazîne-i celîlesi A‘şâr Emâneti Tahrîrât Odası Sınıf-ı Evvel hulefâsından işbu bâ‘isü’l-kitâb rif‘atlü Mehmed Said Bey b. el-merhûm Mesud b. Derviş’in talebiyle sagīr-i mezbûrun babası müteveffâ-yı mezbûrdan mevrûs mâlı nemâsından işbu târih-i vesîkadan itibâren kadr-ı ma‘rûf idiği bi’l-ihbâr zâhir olan şehriye iki yüz guruş kıbel-i şer‘den nafaka ve kisve-bahâ farz ve takdîr olunup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer sagīr-i mezbûrun mâlı nemâsına rücû‘a vasîyy-i mezbûre Fatıma Melek Hanım’a izâfetle vekîl-i mûmâ-ileyh es-Seyyid Mehmed Said Bey’e izin verildiğini Teftîş-i Evkāf Mahkemesi Beytü’l-mâl Kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 20 Rebî‘ülâhir sene [1]301 Şühûdü’l-hâl: Hazret-i Hüdâyî dedelerinden Ahmed Efendi b. Ali, Muhzır Mehmed Ağa b. Mustafa ve gayruhum.