Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 220 Hüküm no: 164 Orijinal metin no: [108-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Paşa Vakfı mütevellisi Nefise Râtibe Hanım’ın, kendi yerine Hasan Bey’i vekil tayin ettiği Ali, nasb-ı vekîl Numara: 156, 40 guruş Nezâret-i Haremeyn-i Muhteremeyn’e mülhak evkāfdan İstanbul’da Hobyar mahallesinde vâki‘ sadr-ı esbak merhûm Hacı Ahmed Paşa Vakfı’nın bi’l-meşrûta ve bâ-berât-ı âlî mütevelliyesi olup zâtı Rüsûmât Muhâsebesi Emti‘a-i Ecnebiye Kâtibi Osman Şevket Efendi b. Mehmed b. Abdullah ve Şehremâneti Ketebesi’nden Neşet Bey b. İbrahim b. Mustafa ta‘rîfleriyle mu‘arrefe olan batn-ı evvelde ekber ve aslah ve erşed evlâd-ı evlâd-ı evlâd-ı vâkıfdan Nefise Râtibe Hanım bt. Mahmud b. Hasan Mâliye Hazîne-i celîlesinde Vâridât-ı Umûmiye Hulefâsı’ndan batn-ı sânîde evlâd-ı evlâd-ı evlâd-ı vâkıfdan işbu bâ‘isü’l-kitâb Hasan Bey b. el-Hâc Reşad mahzarında ikrâr ve takrîr-i kelâm edüp ben müsin ve alîle olarak vakf-ı mezkûrun umûrunu kemâ-hiye hakkuhâ idâre ve rü’yet edemediğimden vakf-ı mezkûrun kâffe-i umûrunu idâre ve rü’yete tarafımdan mûmâ-ileyh Hasan Bey’i vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 24 Safer sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.