Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 221 Hüküm no: 165 Orijinal metin no: [109-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzonlu Osman Ağa’nın vefatıyla çocuklarına kalan evin satılmasına izin verilmesi Nazmi, izin: 1 kıt‘a Numara: 324, harcı: 38 guruş Mahmiye-i İstanbul’da Şehremîni kurbünde Deniz Abdal mahallesinde sâkin iken bundan akdem vefât eden Trabzonî el-Hâc Osman Ağa b. Mehmed’in sulbî sagīr mahdûmları Nureddin ve Ali’nin vâlideleri ve tesviye-i emirlerine bâ-hüccet-i şer‘iye vasîyy-i mansûbeleri olup zâtı Bâb-ı Seraskerî Piyâde Dâiresi Birinci Şu‘be Odacısı es-Seyyid Hüseyin Ağa b. Ahmed b. Ömer ve kısmet-i askeriye muhzırlarından Salim Ağa b. el-Hâc Ömer b. Abdullah ta‘rîfleriyle mu‘arrefe olan işbu bâ‘isetü’l-kitâb Hâce Han nâm-ı diğer Âişe Hanım bt. Ebî Bekir b. Musa bi’l-vesâye takrîr-i kelâm ve ta‘bîr ani’l-merâm edüp mahalle-i mezbûrede Mimârşücaeddin Mescid-i şerîfi Vakfı mülhakātından Bozacızâde İsmail Efendi Vakfı müsakkafâtından mahalle-i mezbûrede Çıkmaz Dibek sokağında iki numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin üç rub‘ hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna insâfen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı nâfi‘ olduğundan mâ‘adâ sagīrân-ı mezbûrânın nafaka ve kisveye dahi ihtiyâçları olmağla sagīrân-ı mezbûrânın menzil-i mezkûrda olan üç rub‘ hisseleri bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olan hâlen kassâm-ı askerî fazîletlü Mehmed Emin Efendi ile Üçüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan üç rub‘ hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yedi bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 15 Cumâdelûlâ sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere vasîyy-i mezbûre Hâce Han nâm-ı diğer Âişe Hanım sagīrân-ı mezbûrânın menzil-i mezkûrda olan üç rub‘ hisse-i şâyi‘aları bedel-i misli idiği mütehakkık olan yedi bin beş yüz guruş mukābelesinde muhzır rüfekāsından Şevki Ağa b. Ahmed’e ol dahi der-akab meblağ-ı merkūm mukābelesinde vasîyy-i mezbûre Hâce Han nâm-ı diğer Âişe Hanım’a kat‘iyyen ba‘de’l-ferâğ vasîyy-i mezbûre Hâce Han nâm-ı diğer Âişe Hanım sagīrân-ı mezbûrânın müşterek mâllarından ve li-ecli’l-i[dâ]ne vasî nasb olunan Şevki Ağa yedinden lira-yı Osmânî yüz guruş hesâbıyla istidâne ve kabz eylediği yedi bin beş yüz guruş deyni mukābelesinde sagīrân-ı mezbûrâna vefâen ferâğ ve tefvîz edeceğinden ol-vechile ferâğları icrâ ve sened-i hâkānîsi i‘tâ olunmak üzere işbu mahalle şerh verildi. Fî 15 Ca sene [1]301