Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 222 Hüküm no: 166 Orijinal metin no: [109-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin vefatıyla küçük oğluna intikal eden evin satılmasına izin verilmesi Küçük Hakkı, izin: 1 kıt‘a Numara: 345, 004 guruş Medîne-i Üsküdar’da Çakırcı Hasan Paşa mahallesinde sâkin iken bundan akdem vefât eden esbak Harc Ağası el-Hâc Ahmed Efendi b. İsmail’in sulbî sagīr oğlu Mehmed Kâzım’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı İkinci Ordu-yı hümâyûn Ondördüncü Alayı’nın İkinci Tabur’un Sağ Kol Ağalarından İzzet Efendi b. Ahmed b. İsmail ve kısmet-i askeriye muhzırlarından Hasan Efendi b. İbrahim b. Rüstem ta‘rîfleriyle mu‘arrefe olan işbu bâ‘isetü’l-kitâb Fâtımatü’z-zehra Hanım bt. Ahmed bi’l-vesâye takrîr-i kelâm edüp cennet-mekân firdevs-âşiyân Gāzi Sultan Osman Han -tâbe serâhû- hazretleri evkāf-ı şerîfeleri musakkafâtından mahalle-i mezbûrede Orta sokakda üç numara ile murakkam ma‘lûmü’l-hudûd ve’l-müştemilât şehriye dokuz akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sulbî sagīr oğlu Mehmed Kâzım ve sulbî kebîr oğulları Mehmed İzzet ve İsmail Enver ve Ahmed Ziya beyler ile sulbiye kebîre kızları Âişe Safvet ve Hadice Servet Hanım’a hasbe’l-âde isdâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı nâfi‘ olduğundan mâ‘adâ sagīr-i mezbûrun nafaka ve kisveye dahi ihtiyâcı olmağla sagīr-i mezbûrun menzil-i mezkûrda olan bir südüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz birle i‘mâl ve istirbâh olunup hâsılı olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup medîne-i mezkûre nâibi fazîletlü Mehmed Salim Efendi ile Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan bir südüs hisse-i şâyi‘ası [110] bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yedi yüz doksan yedi guruş mukābelesinde bâ-re’y-i mütevellî âhara ferâğa izin taleb şüd. Fî 24 Ca sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.