Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 223 Hüküm no: 167 Orijinal metin no: [110-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum milletinden Kolobi’ye ait olup emaneten İstefani’de bulunan bağ ve gedik âletlerinin vekâleti sebebiyle Nikola’ya teslimi Şevket, vekâlet: 1 kıt‘a Numara: 357, 40 guruş Tashîh sahîhdir, Muhyiddin Yanya Vilâyeti dâhilinde Leskovik sancağı mülhakātından Pogon kazâsına tâbi‘ Voştine kasabasında sâkine Devlet-i aliyye teba‘asının Rum milleti nisvânından Kalobi bt. el-müteveffâ Vasil v. Hıristo tarafından ber-vech-i âtî vekâlet iddi‘â eden işbu bâ‘isü’r-rakīm teba‘a ve millet-i merkūmeden Kasab Nikola v. Hıristo v. Parşako zikri âtî bağçe ve âlât-ı gedik hisselerine bi’l-emâne vâzı‘ü’l-yed olan teba‘a ve millet-i merkūmeden İstefani v. Dimitri v. Yani muvâcehesinde üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan Emin-i Ganem merhûm Mustafa Çavuş Vakfı musakkafâtından İstanbul’da Yedikule kurbünde el-Hâc Pîrî mahallesinde kâin ma‘lûmü’l-hudûd ve’l-müştemilât şehriye seksen akçe bir pul icâre-i müeccelelü Büyük Horoslu demekle ma‘rûf bir bâb bostanın sülüs hisse-i şâyi‘ası ve derûnunda mevcûde cennet-mekân adn-âşiyân merhûm ve mağfûrun-leh Sultan Mahmud Hân-ı sânî -tâbe serâhû- hazretleri evkāf-ı şerîfeleri müstegallâtından gedik ta‘bîr olunur yevmî bir akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla kırk sehm hisse-i şâyi‘ası müvekkilem merkūma, babamız müteveffâ-yı merkūm Vasil intikālinden bâ-temessük-i mütevellî ve nizâm bi’l-icâreteyn taht-ı tasarrufunda ve merkūm İstefani hisse-i mezkûrelere müvekkilem merkūmenin teslîmiyle bi’l-emâne vâzı‘ü’l-yed olup ancak müvekkilem merkūme hisse-i şâyi‘a-i mezkûreleri merkūmun yedinden nez‘ ü kabza ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Rebî‘ülâhirinin on üçüncü günü târihiyle müverraha kazâ-i mezkûr nâibi Abdullah Efendi’nin imzâ ve mutâbık hâtemini hâviye bir kıt‘a vekâlet ve zahrında muharrer kazâ-i mezkûr bidâyet mahkemesinin memhûr mazbatası mûceblerince mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn [ve] haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve bana teslîme merkūm İstefan’a tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûrelere gāibe-i merkūmenin ber-vech-i muharrer taht-ı tasarrufunda olup kendisi dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve me‘âli <> müdde‘î-i merkūmun takrîr-i meşrûhuna muvâfık bulunduğu ve mazbata-i mezkûre dahi mazmûn-ı hüccet-i mezkûreyi müeyyid ve musaddık olarak tezvîr ve tasnî‘den sâlim idiği münfehim ve Mecelle-i Ahkâm-ı Adliyye’nin bin sekiz yüz yirmi birinci bendi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm bostan ve gedik-i mezkûrların hisse-i şâyi‘a-i mezkûrelerden keff-i yed ve vekîl-i merkūm Nikola’ya teslîme merkūm İstefani’ye tenbîh olunmağın mâ-vaka‘a bi’t-taleb ketb şüd. Fî 2 Cemâziyelevvel sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.