Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 224 Hüküm no: 168 Orijinal metin no: [110-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fodula Kâtibi Mehmed Efendi’nin vefatıyla çocuklarına intikal eden ev ve dükkânların satılmasına izin verilmesi Mahmiye-i İstanbul’da Ayasofya-i kebîr kurbünde İshak Paşa mahallesinde sâkin iken bundan akdem vefât eden Saray-ı hümâyûn Fodula Kâtibi Mehmed Efendi b. Hüseyin b. Abdullah’ın sulbî sagīr mahdûmları İsmail Hakkı ve Ahmed Muhtâr beylerin vâlideleri ve tesviye-i emirlerine bâ-hüccet-i şer‘iye vasîyy-i mansûbeleri olup zâtı Evkāf-ı hümâyûn Mahlûlât münâdîlerinden Emin Ağa b. Hüseyin b. Abdullah ve yine Münâdî el-Hâc Ahmed Ağa b. Salih ta‘rîfleriyle mu‘arrefe olan işbu bâ‘isetü’l-kitâb Emine Hanım bt. Mehmed b. Abdullah bi’l-vesâye takrîr-i kelâm edüp hudâvendigâr-ı esbak cennet-mekân Sultan Mahmud Hân-ı sânî -tâbe serâhû- hazretleri evkāf-ı celîleleri mülhakātından Hançerli merhûme Fatıma Sultan Vakfı müsakkafâtından mahmiye-i mezbûrede Ayasofya-i sagīr kurbünde Demirci sokağında vâki‘ şehriye doksan akçe icâre-i müeccelelü ma‘lûmü’l-hudûd tahtında on dört numaralı enserci dükkânı ve müştemilât-ı sâire-i ma‘lûmeyi hâvî bir numara ile murakkam bir bâb menzilin nısf hissesi ve Nezâret-i Evkāf-ı hümâyûna mülhak evkāfdan Aydın Ağa Vakfı müsakkafâtından Aksaray kurbünde Horhor nâm mahâlde Kırk Minâre mahallesinde vâki‘ şehriye yüz dokuz akçe icâre-i müeccelelü birbirine muttasıl altmış sekiz ve yetmiş numara ile murakkam bir bâb kömürcü [111] ve bir bâb kafesci dükkânlarının müstakıli vâlidesi müteveffât Hâce Fatıma Hatun bt. Hasan intikālinden müteveffâ-yı mûmâ-ileyh karındaşları el-Hâc Ali Efendi ve Âlime Hatun’un bi’l-icâreteyn iştirâken ve şâyi‘an tasarruflarında iken mûmâ-ileyh Mehmed Efendi’nin ber-vech-i muharrer vefâtıyla nısf hisse menzil ve dükkân ile müstakil iki bâb dükkânda olan sülüs hisseleri sıgārân-ı mezbûrân ile sulbî kebîr mahdûmu Mehmed Haşim Bey ve sulbiye kebîre kerîmeleri Sabiha Hanım’a hasbe’l-âde irbâ‘an intikāl edüp lâkin menzil ve dükkân-ı mezkûrlar ânen fe-ânen müşrif-i harâb olarak hâsılları harçlarına vefâ etmediğinden mâ‘adâ kebîrân-ı mezkûrân dahi menzil ve dükkân-ı mezkûrlarda olan hisselerini âhara ferâğ edeceklerinden sagīrân-ı mezbûrânın hisselerinin intifâ‘ ve birer sûretde tefrîki gayr-ı kābil olarak bekāları haklarında muzır ve gayr-ı müfîd olmağla sagīrân-ı mezbûrânın nısf hisse menzil ve dükkân ile müstakil iki bâb dükkân-ı mezkûrda olan sülüsden ikişer rub‘ hisse-i şâyi‘aları kebîrân-ı mezbûrânın hisseleriyle bedel-i misilleri ve mütevellîleri re’yleriyle âhara ferâğ ve bedelleri ahz ü kabz ve müteveffâ-yı mezbûrun Evkāf-ı hümâyûn Beytü’l-mâl Kassâmlığı cânibi ma‘rifetiyle tahrîr olunan terekesi defter-i kassâm zeyline idhâl birle i‘mâl ve istirbâh olunup hâsıl olan nemâsıyla ma‘an hıfz olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup Birinci Dâire-i Belediye tarafından i‘tâ olunan memhûr iki kıt‘a tahmîn-i bedel pusulası mantûkunca sagīrân-ı mezbûrânın hisse-i şayi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla mârrü’l-beyân nısf hisse menzil ve dükkân-ı mezkûrlardan sülüsden iki rub‘ hisse-i şâyi‘aları iki bin seksen dört guruş ve müstakil iki bâb dükkân-ı mezkûrlardan kezâlik sülüsden iki rub‘ hisse-i şâyi‘aları bin yüz yetmiş yedi guruş ki cem‘an üç bin iki yüz elli bir guruş mukābelesinde âhara ferâğa izin taleb şüd. Fî 8 Ca sene [1]301 Şühûdü’l-hâl: Münâdî el-Hâc Ahmed Ağa b. Ahmed, Münâdî Emin Ağa b. Hüseyin ve gayruhum.