Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 225 Hüküm no: 169 Orijinal metin no: [111-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi’den çocuklarına kalan arsanın satılmasına izin verilmesi Küçük Hakkı, izin: 1 kıt‘a Numara: 337, 2,5 guruş Mahmiye-i İstanbul’da Aksaray kurbünde Çakır Ağa mahallesinde sâkin iken bundan akdem vefât eden el-Hâc Ahmed Efendi b. Abdülhamid’in sulbiye sagīre kızı Vasfiye’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı kısmet-i askeriye muhzırlarından Hasan Efendi b. Seyyid Hüseyin b. Mehmed ve Mehmed Efendi b. Ebî Bekir b. Ahmed ta‘rîfleriyle mu‘arrefe olan işbu bâ‘isetü’l-kitâb Hüsna Hanım bt. Abdullah bi’l-vesâye takrîr-i kelâm edüp Haremeyn-i şerîfeyn -şerrefehumullâhu te‘âlâ- Evkāfı müsakkafâtından mahalle-i mezbûrede Sancakdâr Hayreddin sokağında sekiz numara ile murakkam ma‘lûmü’l-hudûd ve’l-müştemilât şehriye otuz beş akçe icâre-i müeccelelü bir kıt‘a muhterik menzil arsası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbî kebîr oğlu Mehmed Şükrü Efendi ve sulbiye kebîre kızı Fatıma Samiye Hanım’a hasbe’l-âde ihmâsen intikāl edüp lâkin arsa-i mezkûrun etrâfını muhît taş duvarları münhedim olarak enkāzı mürûr-ı eyyâm [ile] telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı nâfi‘ olduğundan mâ‘adâ sagīre-i mezbûrenin nafaka ve kisveye eşedd-i ihtiyâcı olmağla sagīre-i mezbûrenin arsa-i mezkûrede olan sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olunduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin arsa-i mezkûrda olan sülüs hisse-i şâyi‘asını yedinden ahzla lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 19 Cemâziyelevvel sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.