Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 226 Hüküm no: 170 Orijinal metin no: [112-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Efendi’den çocuğuna intikal eden evin satılmasına izin verilmesi Küçük Aziz, izin: kıt‘a Numara: 390, 9 guruş Mahmiye-i İstanbul’da Dırağman kurbünde Tercümanyunus mahallesinde sâkin iken bundan akdem vefât eden İdâre-i Mahsûsa Fabrika-i hümâyûnu Ustabaşısı el-Hâc Ali Efendi b. Mehmed’in sulbî sagīr oğlu Kerameddin’in li-ebeveyn birâderi ve tesviye-i umûruna bâ-hüccet-i şer‘iye vasîyy-i mansûbesi işbu bâ‘isü’l-kitâb Mehmed Hayreddin Efendi bi’l-vesâye takrîr-i kelâm ve ta‘bîr ani’l-merâm edüp merhûm eş-Şeyh Osman Efendi’nin Hırka-i şerîf Odası’nda kırâet olunmak üzere vaz‘ eylediği eczâ-i şerîfesi vakfı müsakkafâtından mahalle-i mezbûrede Dırağman Çeşmesi caddesinde on yedi numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin üç rub‘ hisse-i şâyi‘ası müteveffâ-yı mezbûrun hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile bana ve sulbiye kebîre kerîmeleri Ülfet ve Şaziye hanımlara irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla üç rub‘ hisse menzil-i mezkûrdan sagīr-i mezbûrun rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca menzil-i mezkûrun üç rub‘ hissesinden sagīr-i mezbûrun rub‘ hissesini bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin yedi yüz altı guruş mukābelesinde bâ-re’y-i mütevellî âhara ferâğa izin taleb şüd. Fî 28 Cemâziyelevvel sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.