Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 227 Hüküm no: 171 Orijinal metin no: [112-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum milletinden Panayot’un vefatıyla çocuklarına kalan evlerin satılmasına izin verilmesi Nazmi, izin: 2 kıt‘a Numara: 336, 81,5 guruş Galata’ya muzâfe İstinye nâhiyesine tâbi‘ Boyacı karyesinde sâkin iken bundan akdem fevt olan Devlet-i aliyye teba‘asının Rum milletinden Panayot v. Kostandi’nin sulbî sagīr oğulları Todori ve Yanko ve Kosti ve Penaloz ve Niko’nun anaları ve tesviye-i emirlerine bâ-hüccet-i şer‘iye vasîyy-i mansûbeleri teba‘a ve millet-i merkūme nisvânından Harifile’nin babası ve tarafından husûs-ı âtîde vekîl olduğu şahs-ı merkūmeyi ârifân Balat’da Hacı İsa mahallesinde sâkin kısmet-i askeriye muhzırlarından Tosun Ağa b. Mehmed b. Abdullah ve adliye hademesinden Yusuf Ağa b. Ömer b. Hüseyin haberleriyle mütehakkık olan teba‘a ve millet-i merkūmeden işbu bâ‘isü’r-rakīm Kürekçi Yanko v. Likor v. Atam bi’l-vekâle takrîr-i kelâm edüp hudâvendigâr-ı esbak cennet-mekân Sultan Abdülhamid Han hazretlerinin evkāf-ı şerîfeleri müsakkafâtından karye-i mezkûrede Kilise sokağında on dört numara ile murakkam ma‘lûmü’l-hudûd ve’l-müştemilât şehriye kırk akçe icâre-i müeccelelü bir bâb menzil müstakıllen ve yine vakf-ı müşârün-ileyh müsakkafâtından karye ve sokak-ı mezkûrda on altı numara ile murakkam ma‘lûmü’l-hudûd ve’l-müştemilât şehriye doksan akçe icâre-i müeccelelü diğer bir bâb menzilin dahi nısf hissesi şâyi‘an müteveffâ-yı merkūmun sağlığında bâ-temessükât-ı mütevellî bi’l-icâreteyn taht-ı tasarrufunda olup ba‘de fevtihî sıgār-ı merkūmûn ile sulbiye kebîre kızları Manyo ve Bedliya ve Avanta’ya islâsen intikāl edüp lâkin menzileyn-i mezkûreyn ânen fe-ânen müşrif-i [harâb] olarak hâsılı harçlarına vefâ etmeyip bekāları sıgār-ı merkūmûn haklarında muzır ve gayr-ı müfîd olduğundan mâ‘adâ sıgār-ı merkūmûnun nafaka ve kisveye dahi eşedd-i ihtiyâçları olmağla sıgār-ı merkūmûnun müstakil ve nısf hisse menzileyn-i mezkûreynde olan hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı merkūmûn haklarında her vechile enfa‘ ve evlâ olduğuna binâen işbu yedimde olup hâlen kassâm-ı askerî fazîletlü Mehmed Emin Efendi ile Beşinci Dâire-i Belediye tarafından i‘tâ olunan memhûr iki kıt‘a tahmîn-i bedel pusulası mantûklarınca sıgār-ı merkūmûnun müstakil ve nısf hisse menzileyn-i mezkûreynde olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla müstakil menzil-i mezkûrda olan hisse-i şâyi‘aları bin sekiz yüz yetmiş beş guruş ve nısf hisse menzil-i mezkûrda olan hisse-i şâyi‘aları dahi on bir bin beş yüz altmış iki buçuk guruş ki cem‘an on üç bin dört yüz otuz yedi buçuk guruş mukābelesinde bâ-re’y-i mütevellî âhara [ferâğa] izin taleb şüd. Fî 24 Ca sene [1]301 Şühûdü’l-hâl: Muhzır Mehmed Ağa b. Mustafa, Ömer Ağa b. Abdulkadir ve gayruhum.