Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 228 Hüküm no: 172 Orijinal metin no: [113-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Leyla Hanım’ın vefatıyla çocuğuna kalan evin satılmasına izin verilmesi Küçük Hakkı, izin: 1 kıt‘a Numara: 337, 5 guruş Mahmiye-i İstanbul’da Davud Paşa mahallesinde sâkine iken bundan akdem vefât eden zenciye Fatıma Leyla Hanım bt. Abdullah’ın sadrî sagīr oğlu İbrahim’in babası ve velîsi olup mahmûdü’l-hâl idiği ihbâr olunan işbu bâ‘isü’l-kitâb zenci Mehmed Zîver Ağa b. Abdullah bi’l-velâye takrîr-i kelâm edüp Nezâret-i Evkāf-ı hümâyûn’a mülhak evkāfdan Aşçı Ali Ağa Vakfı müsakkafâtından mahalle-i mezbûrede Bozacı sokağında altı numara ile murakkam ma‘lûmü’l-hudûd ve’l-müştemilât şehriye on iki akçe icâre-i müeccelelü bir bâb menzil vâlidesi müteveffât zenciye Halime Kadın bt. Abdullah intikālinden müteveffât-ı mezbûrenin hayatında âdiyen taht-ı tasarrufunda olup ba‘de vefâtihî sagīr-i mezbûr ile sadriye sagīre kızı Hacer’e münâsafeten ba‘de’l-intikāl sagīrân-ı mezbûrândan Hacer’in dahi vefâtıyla nısf hisse-i şâyi‘ası mahlûl ve cânib-i vakfa âid ve râci‘ olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olup ben dahi mu‘sir olarak infâka gayr-ı muktedir olmamla menzil-i mezkûrdan sagīre-i mezbûrun nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli [ahz] ü kabz birle i‘mâl ve istirbâh olunup hâsılı olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olunduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca menzil-i mezkûrdan sagīr-i mezbûrun nısf hissesi bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin guruş mukābelesinde bâ-re’y-i mütevellî âhara ferâğa izin taleb şüd. Fî 23 Cemâziyelevvel sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere veliyy-i mezbûr Mehmed Zîver Ağa sagīr-i mezbûrun menzil-i mezkûrda olan nısf hisse-i şâyi‘asını bedel-i misli idiği mütehakkık olan bin guruş mukābelesinde ve Muhzır Mehmed Ağa b. Mehmed’e ol dahi der-akab meblağ-ı merkūm mukābelesinde veliyy-i mezbûr Mehmed Zîver Ağa’ya kat‘iyyen ba‘de’l-ferâğ veliyy-i mezbûr Zîver Ağa sagīr-i mezbûrun mâlından ve li-ecli’l-idâne vasî nasb olunan Mehmed Ağa yedinden lira-yı Osmânî yüz guruş hesâbıyla istidâne ve kabz eylediği bin guruş deyni mukābelesinde sagīr-i mezbûra vefâen ferâğ ve tefvîz edeceğinden ol-vechile ferâğları icrâ ve sened-i hâkānîsi i‘tâ olunmak üzere işbu mahalle şerh verildi. Fî 23 Ca sene [1]301