Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 121 Hüküm no: 52 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cennet bt. Ahmed’in, kızı Âlime’nin küpesini ve başlığını gasbeden Receb Beşe b. Abdullah ile olan davasından sulh yolu ile vazgeçtiği Havâss-ı aliyye müzâfâtından kasaba-i Hasköy’de ( ) mahallesi sâkinelerinden işbu bâ‘isetü’l-kitâb Cennet bt. Ahmed nâm hâtun mahfil-i kazâda Receb Beşe b. Abdullah nâm kimesne mahzarında üzerine da‘vâ ve takrîr-i kelâm edip târih-i kitâbdan yedi sene mukaddem Cihangir mahallesi sokağında gider iken kızım Âlime nâm sagīrenin kulağından altı yüz elli akçe kıymetli bir tek incili küpe ve beş yüz elli akçe kıymetli sırmalı ter-pûşını mezbûr Receb Beşe ahz ve gasb etmişidi deyû bundan akdem mezbûrdan da‘vâ ve taleb ettiğimde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip da‘vâ-yı mezbûrumdan mezbûr Receb Beşe ile beynimizde beş yüz akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr beş yüz akçeyi merkūm Receb Beşe yedinden tamâmen ahz u kabz edip husûs-ı mezbûra müte‘allika da‘vâdan mezbûr Receb Beşe benim zimmetimi ben dahi mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, İbrahim Çelebi b. Mehmed, Abdi Çelebi b. Hüseyin, Mehmed b. Ramazan.