Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 235 Hüküm no: 178 Orijinal metin no: [116-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşref Ağa’nın vefatıyla kızına kalan evin satılmasına izin verilmesi Mehmed Necib, izin: 1 kıt‘a Numara: 391, 11,5 guruş Mahrûse-i Galata’ya muzâfe kasaba-i Fındıklı’da Pürtelaş Hasan mahallesinde sâkin iken bundan akdem vefât eden Eşref Ağa b. İsmail’in sulbiye sagīre kızı Havva’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı Galata muhzırlarından Vahid Ağa b. Mehmed b. Abdülvahid ve Saray-ı hümâyûn faytoncularından Hasan Ağa b. Mehmed b. Yusuf ta‘rîfleriyle mu‘arrefe olan işbu bâ‘isetü’l-kitâb Hadice Hanım bt. Mehmed bi’l-vesâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merkūm Bâlî Çelebi Vakfı müsakkafâtından mahalle-i mezbûrede İshak ...? sokağında iki numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası vâlidesi müteveffât Nefise Hanım bt. İsmail intikālinden hayatında müteveffâ-yı mezbûr ile li-ebeveyn karındaşı Mehmed İzzet Ağa’nın âdiyen bi’l-icâreteyn tasarrufunda <> iken mezbûr Eşref Ağa’nın fevtiyle menzil-i mezkûrda olan rub‘ hisse-i şâyi‘ası kızı sagīre-i mezbûreye hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin menzil-i mezkûrda olan rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlen mahrûse-i mezkûre kādısı fazîletlü Ahmed Nuri Efendi ile Dördüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin üç yüz guruş mukābelesinde âhara ferâğ izin taleb şüd. Fî 13 C sene [1]301 Şühûdü’l-hâl: Mehmed Ağa b. Abdulkadir, Mehmed Ağa b. Mustafa ve gayruhum.