Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 236 Hüküm no: 180 Orijinal metin no: [117-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in vefatıyla çocuklarına kalan evin satılmasına izin talebi ve satış için Mustafa Efendi’nin vekil tayini Küçük Aziz, izinli vekâlet: 1 kıt‘a Numara: 307, 40 guruş Medîne-i Konya mahallâtından Bayram Paşa mahallesinde sâkin iken bundan akdem vefât eden Asâkir-i şâhâneden mütekā‘id el-Hâc Ali Bey b. Mehmed b. Abdullah’ın sulbî sagīr oğlu Hüseyin Bey’in vâlidesi ve tesviye-i umûruna bâ-hüccet-i şer‘iye vasîyy-i mansûbesi olup mahalle-i mezbûrede sâkine Fâtımatü’z-zehra Hanım bt. Abdullah ile müteveffâ-yı mûmâ-ileyhin diğer sulbiye sagīre kızı Zekiye’nin vâlidesi ve kezâlik tesviye-i umûruna bâ-hüccet-i şer‘iye vasîyy-i mansûbesi yine mahalle-i mezkûrede sâkine Zekiye Fidan Kadın bt. diğer Abdullah tarafından ber-vech-i âtî vekâlet iddi‘â eden gāibe-i vasîyy-i mezbûre Fâtımatü’z-zehra Hanım’ın zevci işbu bâ‘isü’l-kitâb Mustafa Efendi b. el-Hâc Osman zikri âtî menzil hissesine bi’l-emâne vâzı‘ü’l-yed olan kasab esnâfından diğer Mustafa Ağa b. Ahmed mahzarında üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan merhûm Börekçi Hasan Ağa Vakfı müsakkafâtından mahmiye-i İstanbul’da Langa-i kebîr kurbünde Çakır Ağa mahallesinde Bakla sokağında yirmi dokuz numaralı ma‘lûmü’l-hudûd ve’l-müştemilât şehriye on akçe icâre-i müeccelelü bir bâb menzilin nısf hisse-i şâyi‘ası müteveffâ-yı merkūmun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde münâsafeten intikāl ederek mezbûr Mustafa Ağa hisse-i mezkûreyi müteveffâ-yı mezbûrun hayatında teslîmiyle bi’l-emâne vâzı‘ü’l-yed olup lâkin menzil-i mezkûr ânen fe-ânen müşrif-i harâb olarak harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye eşedd-i ihtiyâçları olmağla vasiyetân-ı gāibetân-ı mezbûretân sagīrân-ı mezbûrânın menzil-i mezkûrda olan nısf hisse-i şâyi‘alarını merkūm Mustafa Ağa yedinden nez‘ birle ahz ü kabza ve ba‘de’l-kabz bedel-i misliyle bâ-re’y-i mütevellî âhara ferâğa kıbel-i şer‘den izin talebine ve ba‘de’l-izn bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup medîne-i mezkûre nâibi fazîletlü es-Seyyid Mehmed Emin Efendi’nin imzâ ve hâtemini hâviye bir kıt‘a hüccet-i şer‘iye ve zahrında muharrer Konya Vilâyeti İstînâf Mahkemesi’nin memhûr mazbatası mantûklarınca mahkeme-i mezbûrede taraflarından beni âharı tevkîle mezûn olmak üzere bi’l-muvâcehe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn eylediklerinde vekâlet-i mezkûreyi kabûl etmemle suâl olunup nısf hisse-i şâyi‘a-i menzil-i mezkûreden keff-i yed ve bana teslîme mezbûr Mustafa Ağa’ya tenbîh olunmak murâdımdır dedikde gıbbe’s-suâl ol dahi cevâbında nısf hisse menzil-i mezkûr sagīrân-ı mezbûrânın intikālen bi’l-icâreteyn taht-ı tasarrufunda olup kendisi dahi hisse-i mezkûreye ber-vech-i muharrer bi’l-emâne vâzı‘ü’l-yed olduğunu tâyi‘an ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cenâb-ı fetvâhâneden tahşiye ve temhîr kılındığı ve me‘âli müdde‘î-i mezbûrun bi’l-cümle takrîr-i meşrûhuna mutâbık ve mazbata-i mezkûre dahi mazmûn-ı hüccet-i mezkûreyi müeyyid ve musaddık bulunduğu ve ol-vechile hüccet-i mezkûre şübhe-i tezvîr ve tasnî‘den sâlim olduğu münfehim ve Mecelle-i Ahkâm-ı Adliyye’nin bin sekiz yüz yirmi birinci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince ba‘de’l-hükm nısf hisse-i menzil-i mezkûrdan keff-i yed ve müdde‘î vekîli mezbûr Mustafa Ağa’ya teslîme mezbûr diğer Mustafa Ağa’ya tenbîh olunmağın mâ-vaka‘a bi’t-taleb ketb olundu. Fî 8 Safer sene [1]301 Şühûdü’l-hâl: Muhzır Ömer Ağa b. Abdulkadir, Mehmed Ağa b. Mustafa ve gayruhum.