Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 238 Hüküm no: 181 Orijinal metin no: [118-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bahaddin Efendi’nin üzerindeki tevliyet ve cibâyet cihetlerinin idaresi için damadı Mehmed Tevfik Efendi’yi vekil tayin ettiği Nazmi, nasb-ı vekîl Numara: 413, 40 guruş Galata’ya muzâfe kasaba-i Tophâne’de vâki‘ Karabaş demekle ma‘rûf merhûm Mustafa Ağa Câmi‘-i şerîfinin bâ-berât-ı âlî imâmı olduğu Fatih kurbünde Hoca Üveys mahallesinde sâkin Mahmud Çelebi Vakfı’nın câbîsi Ali Efendi b. Ali b. Mehmed ve Beşinci Kadın hazretlerinin mu‘tak ağalarından Elmas Ağa b. Abdullah b. Hasan haberleriyle zâhir ve mütehakkık olan es-Seyyid Mehmed Bahaddin Efendi b. Salih b. Ahmed dâmâdı olup kezâlik mahalle-i mezbûrede sâkin işbu bâ‘isü’l-kitâb Mehmed Tevfik Efendi b. Ahmed mahzarında ikrâr ve takrîr-i kelâm edüp vâkıf-ı mûmâ-ileyhin mescid-i şerîf-i mezkûrda imâm olanlara meşrûta Mescid Zâviyesi Vakfı’nın yevmî beş akçe vazîfe ile tevliyet ve nezâreti Evkāf-ı hümâyûna mülhak evkāfdan yine kasaba-i mezkûrede Çavuşbaşı nâm mahâlde vâki‘ Dîvân-ı hümâyûn kîsedârı müteveffâ Hacı Mehmed İzari Câmi‘-i şerîfi Vakfı’ndan almak üzere yevmî on akçe vazîfe ile cibâyet cihetleri benim bâ-berât-ı âlî uhdemde olup lâkin ben alîl ve ihtiyâr olduğumdan tevliyet ve cibâyet-i mezkûrların umûrlarını idâre ve rü’yete ve müsakkafât ve müstegallâtlarının icârâtını tahsîle ve muhâsebelerini rü’yete ve da‘vâ ve nizâ‘ zuhûr eder ise terâfu‘alarına ve vezâif ve âidât-ı sâirelerini ahz ü kabza ve makbûzunu bana i‘tâya ve husûs-ı mezkûr mütevakkıf olduğu umûrun küllîsine mahkemenin dördüncü numarası cerîdesinin birinci sahîfesinde mukayyed zabtı mûcebince tarafımdan gāib ani’l-meclis Hafız Hüseyin Efendi b. el-Hâc Cemil’i vekîl nasb ü ta‘yîn etmiş idim. El-hâletü hâzihî mûmâ-ileyhi vekâlet-i mezkûreden azli ile yerine dâmâdım mezbûr Mehmed Tevfik Efendi’yi husûsât-ı mezkûrenin kâffesine vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 26 Cemâziyelâhir sene [1]301 Şühûdü’l-hâl: Ömer Ağa b. Abdulkadir, Mehmed Ağa b. Mustafa ve gayruhum.