Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 238 Hüküm no: 182 Orijinal metin no: [118-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedrosil v. Karabet’in ölümüyle çocuklarına kalan Doğramacı Ohannes’in emaneten elinde bulunan basmacı gediğinin vekâleti sebebiyle Maryem’e verilmesi Hocazâde Ali Rıza, vekâlet: 1 kıt‘a Numara: 374, 40 guruş İskenderi[ye]’de sâkinler Devlet-i aliyye teba‘asının Ermeni milletinden Karabet ve Ekülin v. el-müteveffâ Bedrosil v. Karabet’in anaları olup taraflarından ber-vech-i âtî vekâlet iddi‘â eden şahsı teba‘a-i müşârün-ileyhânın millet-i merkūmesinden Malifoturacı Artin v. Merker v. Agop ve Tuhafcı Karabet v. Mardıros v. Begos ta‘rîfleriyle mu‘arrefe işbu bâ‘isü’r-rakīm teba‘a-i müşârün-ileyhânın millet-i merkūmesi nisvânından Maryem bt. Bağdanet zikri âtî basmahâne hissesine bi’l-emâne vâzı‘ü’l-yed olan gāibân-ı merkūmânın li-ebeveyn karındaşları Doğramacı Ohannes v. el-merkūm Bedros muvâcehesinde üzerine da‘vâ ve takrîr-i kelâm edüp Haremeyn-i şerîfeyn nezâretine mülhak evkāfdan Enderûn-ı hümâyûnda vâki‘ merhûm Süleyman [Sultan] Ahmed Hân-ı sâlis hazretleri kütübhânesi evkāf-ı celîleleri müsakkafâtından İstanbul’da Langa Yenikapısı hâricinde kâin basmahâne derûnunda ikinci bir bâb kârhâne derûnunda mevcûde yine vakf-ı mezkûr müstegallâtından basmacı gediği ta‘bîr olunur yevmî bir akçe icâre-i müeccelelü âlât-ı lâzıme-i ma‘lûmenin rub‘ hisse-i şâyi‘ası babaları zevcem müteveffâ-yı merkūm Bedros intikālinden evlâdım gāibân-ı merkūmân ile <> merkūm Ohannes ve gāib ani’l-beled Kirkor ve Aksebet ve gāib ani’l-meclis Kalor’un âdiyen bi’l-icâreteyn iştirâken ve şâyi‘an taht-ı tasarruflarında ve merkūm Ohannes gāibân-ı merkūmân Karabet ve Ekülin’in birer südüs hisse-i şâyi‘alarına gāibân-ı merkūmânın teslîmleriyle bi’l-emâne vâzı‘ü’l-yed olup ancak gāibân-ı merkūmân ber-vech-i muharrer mutasarrıf oldukları birer südüs hisse-i şâyi‘alarını merkūm Ohannes yedinden nez‘ ü kabza ve ba‘de’l-kabz ecr-i misliyle âhara îcâra ve nizâ‘ vukū‘unda terâfu‘a ve tâlibi zuhûrunda bedel-i misliyle bâ-re’y-i [mütevellî] âhara ferâğa ve ücret ve bedelini ahz ü kabza ve makbûzumu kendülere irsâl ve îsâle ve lede’l-iktizâ sulh ve ibrâya ve husûs-ı mezkûr mütevakkıf olduğu umûrun küllîsine yedimde olup üç yüz senesi Cumâdelâhiresinin on dördüncü günü târihiyle müverraha İskenderiye kādısı fazîletlü Abdurrahman el-Ebyârî? Efendi’nin mührüyle memhûr olup mahrûse-i Mısır Kādısı Kuyucaklızâde fazîletlü es-Seyyid Abdurrahman Nafiz Efendi’nin tasdîki hâvî hâmişine tahşiye ve mutâbık mührüyle temhîr eylediği bir kıt‘a vekâlet hücceti mantûkunca İskenderiye Mahkemesi’nde kādı-yı mûmâ-ileyh huzûrunda şühûd muvâcehesinde taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve vech-i lâyıkıyla bana teslîme oğlum merkūm Ohannes’e tenbîh olunmak bi’l-vekâle matlûbumdur dedikde gıbbe’s-suâl merkūm Ohannes dahi cevâbında hisse-i şâyi‘a-i mezkûra gāibân-ı merkūmânın intikālen bi’l-icâreteyn taht-ı tasarruflarında olup kendisi dahi bi’l-emâne vâzı‘ü’l-yed olduğunu ikrâr mâ‘adâ anası müdde‘iye-i merkūmenin vekâlet müdde‘âsına beyyine taleb olundukda ahrâr-ı ricâl-i gayr-ı Müslimînden olup bu esnâda İskenderiye’den Der-aliyye’ye gelen merkūmân Malifo[tu]racı Artin v. Merker v. Agop ve Tuhafcı Karabet v. Mardıros v. Begos nâm kimesneler li-ecli’ş-şehâde meclis-i şer‘a hâzırân olup [119] isre’l-istişhâd her biri müttefikü’l-lafz ve’l-ma‘nâ alâ-vefkı’l-müdde‘î mufassalan edâ-yı şehâdet-i şer‘iye etdiklerinde şâhidân-ı merkūmân Hacı Küçük Mahallesi İmâmı Hacı Ahmed Efendi b. Hacı <> Mehmed ve Muhtâr-ı evveli Ali Efendi b. Mehmed ve Bıçakçı esnâfı tüccârânından Varyek v. Agop ve Malifo[tu]racı tüccârdan Papasoğlu Agop v. Begos’dan evvelâ bâ-varaka-i mestûre sırran ve ba‘dehû her biri Haci Poli Hanı’nda sâkinler tüccârdan Haci Kostaki v. İstori ve Sekofli v. Yorgi ve Yorgi v. Kosti ve Agop v. Artin ve Pandeli v. Dimitri’den alenen lede’t-tezkiye makbûlü’ş-şehâde idikleri ihbâr olunmağın mûcebince ba‘de’l-hükm hisse-i mezkûrelerden keff-i yed ve anası müdde‘iye-i merkūme Maryem’e teslîme merkūm Ohannes’e tenbîh olunmağın mâ-vaka‘a bi’t-taleb ketb olundu. Fî 28 Cemâziyelevvel sene [1]301 Muhzır Ömer Ağa b. Abdulkadir, Muhzır Mehmed Ağa b. Mustafa ve gayruhum.