Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 240 Hüküm no: 183 Orijinal metin no: [119-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Reşid Ağa’nın kızına kalan arsanın satılmasına izin verilmesi Ali, izin: 1 kıt‘a Numara: 410, 7,5 guruş Mahmiye-i İstanbul’da Davud Paşa İskelesi’nde Kasab İlyas mahallesinde sâkin iken bundan akdem vefât eden Mâbeyn-i hümâyûn kapıcılarından Reşid Ağa b. Abdullah’ın sulbiye sagīre kızı Fatıma’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı <> mahalle-i mezkûre ahâlisinden el-Hâc Ali Efendi b. Abdülkerim b. Mustafa ve es-Seyyid Abidin Ağa b. İbrahim b. Ali ta‘rîfleriyle mu‘arrefe olan işbu bâ‘isetü’l-kitâb Hacer Hanım bt. el-Hâc Hasan bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan Bâyezid-i cedîd mahallesi avârız vakfı müsakkafâtından zikr olunan Kasab İlyas mahallesinde kâin altmış iki numara ile murakkam ma‘lûmü’l-hudûd şehriye altmış akçe icâre-i müeccelelü münhedim bir kıt‘a <> menzil arsasının rub‘ hisse-i şâyi‘ası sagīr-i mezbûrenin bâ-temessük-i mütevellî bi’l-icâreteyn taht-ı tasarrufunda olup lâkin arsa-i mezkûrenin etrâfını muhît taş duvarları münhedim ve enkāzı devr-i eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin arsa-i mezkûrede olan rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin arsa-i mezkûrede olan rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 25 Cemâziyelâhir sene [1]301 Şühûdü’l-hâl: Ömer Ağa b. Abdulkadir, Mehmed Emin Ağa b. Mustafa ve gayruhum.