Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 241 Hüküm no: 184 Orijinal metin no: [119-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arinik bt. Ohannes’in ölümüyle çocuklarına kalan arsanın satılmasına izin verilmesi Küçük Hakkı, izin: 1 kıt‘a Numara: 394, 2 guruş Medîne-i Üsküdar’da Selami Ali Efendi mahallesinde mütemekkine iken bundan akdem fevt olan Devlet-i aliyye teba‘asının Ermeni milleti nisvânından Arinik bt. Ohannes’in sadrî sagīr oğlu kızının ve sadriye sagīre kızı Berançe’nin babaları ve velîleri olup mu‘temedü’l-hâl idiği ihbâr olunan işbu bâ‘isü’r-rakīm teba‘a ve millet-i merkūmeden Kömürcü Mıgırdıç v. Minas bi’l-velâye takrîr-i kelâm edüp Evkāf-ı hümâyûn Hazînesi’nden mazbût evkāfdan merhûm Bâlî Paşa Vakfı müsakkafâtından Kumkapı kurbünde Çadırcı Ahmed Çelebi mahallesinde on iki numara ile murakkam ma‘lûmü’l-hudûd ve’l-müştemilât şehriye kırk akçe icâre-i müeccelelü bir kıt‘a arsanın on beş hisse i‘tibârıyla bir hisse-i şâyi‘ası müteveffât-ı mezbûrenin sağlığında bâ-sened-i hâkānî bi’l-icâreteyn taht-ı tasarrufunda olup ba‘de fevtihî sagīrân-ı mezbûrâna hasbe’l-âde intikāl edüp lâkin arsa-i mezkûrenin etrâfını muhît duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı mezbûrân haklarında muzır ve gayr-ı müfîd olmağla işbu yedimde olup hâlâ medîne-i mezkûre nâibi mekremetlü Mehmed Salim Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın arsa-i mezkûrede olan hisseleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla dört yüz guruş mukābelesinde bâ-re’y-i mütevellî âhara ferâğa izin taleb şüd. Fî 17 Cemâziyelâhir sene [1]301 Şühûdü’l-hâl: Ömer Ağa b. Abdulkadir, Mehmed Ağa b. Mustafa ve gayruhum.