Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 242 Hüküm no: 185 Orijinal metin no: [120-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bosnalı Dimitri’nin ölümüyle çocuklarına kalan ev arsasının satılmasına izin verilmesi Medîne-i Üsküdar’a muzâfe Kādı karyesinde Cafer Ağa mahallesinde sâkin iken bundan akdem fevt olan teba‘a-i Devlet-i aliyyenin Rum milletinden Bosnalı Dimitri v. Petro’nun sulbî sagīr oğlu Yorgi’nin li-ebeveyn er karındaşı ve tesviye-i umûruna bâ-hüccet-i şer‘iye vasîyy-i mansûbu teba‘a ve millet-i merkūmeden Petro müteveffâ-yı merkūmun sulbiye sagīre kızları Evleniye ve Akdaliye ve Sofya ve Emeniye’nin hâleteleri ve tesviye-i umûruna bâ-hüccet-i şer‘iye vasîyy-i mansûbeleri teba‘a-i Devlet-i aliyyeden ve millet-i merkūme nisvânından şahsı her biri teba‘a-i müşârün-ileyhâdan Dimitri v. Yorgi ve Yani v. diğer Yorgi ta‘rîfleriyle mu‘arrefe olan Katrine bt. Despino hâzıra olduğu hâlde bi’l-vesâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan Bâbüssa‘âdeti’ş-şerîfe ağası esbak merhûm Baba Mustafa Ağa Vakfı müsakkafâtından karye-i mezkûrede kâin ma‘lûmü’l-hudûd ve’l-müştemilât şehriye otuz akçe icâre-i müeccelelü muhterik bir bâb menzil arsası müteveffâ-yı merkūmun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı merkūmûn ile bana hasbe’l-âde isdâsen intikāl edüp lâkin arsa-i mezkûrenin etrâf <> duvarları münhedim olarak enkāzı mürûr-ı zaman ile telef ve zâyi‘ olduğu zâhir ve bedîdâr olup ol-vechile bekāsı sıgār-ı merkūmûn haklarında muzır ve gayr-ı müfîd olduğundan mâ‘adâ sıgār-ı merkūmun nafaka ve kisveye dahi eşedd-i ihtiyâçları olmağla sıgār-ı merkūmûnun arsa-i mezkûrede olan beş hums hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffâ-yı merkūmun Teftîş-i Evkāf Mahkemesi’nden tahrîr olunan terekesi defter-i kassâmı zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sıgār-ı merkūmûn haklarında vücûhla enfa‘ ve evlâ olduğuna binâen işbu yedimde olup Onuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sıgār-ı merkūmûnun arsa-i mezkûrede olan hisse-i şâyi‘a-i mezkûreleri bundan akdem lede’l-müzâyede ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi beş bin guruş mukābelesinde bâ-re’y-i mütevellî âhara ferâğa kıbel-i şer‘de vasiyân-ı merkūmân Petro ve Katrine’[ye] izin taleb şüd. Fî Cemâziyelâhir sene [1]301 Şühûdü’l-hâl: Mehmed Ağa b. Mustafa, Muhzır Ömer Ağa b. Kadri ve gayruhum.