Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 243 Hüküm no: 186 Orijinal metin no: [120-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Adile Hanım’ın oğluna kalan evin satılmasına izin verilmesi İbrahim, izin: 1 kıt‘a Numara: 393, 10 guruş Medîne-i Üsküdar’da Rum Mehmedpaşa mahallesinde sâkine iken bundan akdem vefât eden Âdile Hanım bt. Mehmed Emin’in sadrî sagīr oğlu Şükrü’nün li-ebeveyn hâli ve tesviye-i umûruna bâ-hüccet-i şer‘iye vasîyy-i mansûbu işbu bâ‘isü’l-kitâb hademe-i şâhâne yüzbaşılarından İbrahim Aziz Efendi bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan Dergâh-ı âlî kapıcıbaşılarından es-Seyyid el-Hâc Mehmed Ağa Vakfı müsakkafâtından mahalle-i mezbûrede vâki‘ bir numarası ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin hums hisse-i şâyi‘ası müteveffât-ı mezbûre Âdile Hanım intikālinden sagīr-i mezbûrun bâ-sened-i hâkānî bi’l-icâreteyn taht-ı tasarrufunda olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezkûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan hums hisse-i şâyi‘ası bedel-i [misliyle] bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup medîne-i mezkûre nâibi mekremetlü es-Seyyid İbrahim Zühdü Efendi ile Dokuzuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan hums hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin guruş mukābelesinde bâ-re’y-i mütevellî âhara ferâğa izin taleb şüd. Fî 7 Cumâdelâhire sene [1]301 Şühûdü’l-hâl: Ömer Ağa b. Abdulkadir, Mehmed Ağa b. Mustafa ve gayruhum.