Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 243 Hüküm no: 187 Orijinal metin no: [121-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Fahreddin Bey’in vefatıyla çocuklarına kalan ev arsasının satılmasına izin verilmesi Kādızâde Mehmed, izin: 1 kıt‘a Numara: 390, 375 guruş Medîne-i Üsküdar’a tâbi‘ Çengel karyesinde sâkin iken bundan akdem vefât eden es-Seyyid Ahmed Fahreddin Bey b. es-Seyyid Mehmed Emin’in sulbî sagīr mahdûmları es-Seyyid Mehmed Ferid ve es-Seyyid Mehmed Fuad beyler ve sulbiye sagīre kerîmesi Şerife Zeliha Mevhibe Hanım’ın vâlideleri ve tesviye-i emirlerine bâ-hüccet-i şer‘iye vasîyy-i mansûbeleri Münire Hanım bt. Abdullah tarafından husûs-ı âtîde vekîl olduğu zâtını ârifân Üsküdar Mahkemesi Münâdîsi Musa Ağa b. Hacı Bekir ve Mehmed Ağa b. Mustafa haberleriyle zâhir olan rüsûmât memûrlarından işbu bâ‘isü’l-kitâb Musa Ağa b. Mehmed bi’l-vekâle takrîr-i kelâm edüp Nezâret-i Evkāf-ı hümâyûna mülhak evkāfdan Şeyh Sinan Erdebilî Vakfı mülhakātından merhûm Cihan Bey Vakfı müstegallâtından Galata’da Sultan Bâyezid mahallesinde Yenişehirli ...? sokağında vâki‘ bir ve iki numaralar ile murakkam ma‘lûmü’l-hudûd şehriye yetmiş beş akçe icâre-i müeccelelü bir kıt‘a menzil arsası müteveffâ-yı mûmâ-ileyh intikālinden sıgār-ı mezbûrûnun bâ-sened-i hâkānî bi’l-icâreteyn taht-ı tasarruflarında olup lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sıgār-ı mezbûrûn haklarında muzır ve gayr-ı müfîd olduğundan mâ‘adâ sıgār-ı mezbûrûnun nafaka ve kisveye eşedd-i ihtiyâçları olmağla sıgār-ı mezbûrûnun arsa-i mezkûrları bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sıgār-ı mezbûrûn haklarında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Altıncı Dâire-i Belediye taraflarından i‘tâ olan memhûr bir kıt‘a tahmîn-i bedel pusulası mantûkunca sıgār-ı mezbûrûnun arsa-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan yedi yüz aded lira-yı Osmânî mukābelesinde bâ-re’y-i mütevellî âhara ferâğa izin taleb şüd. Fî 27 Cumâdelâhire sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.