Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 244 Hüküm no: 188 Orijinal metin no: [121-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Agasi’ye ait olan değirmen dükkân ve han hisselerini emaneten elinde bulunduran Karnik’in vekâleti sebebiyle Artin’e teslim etmesi Fî 8 Receb sene [1]301 târihiyle kayd olan hüccet Esad, isbât-ı vekâlet: 1 kıt‘a Numara: 431, 40 guruş Dersim vilâyeti dâhilinde Çemişgezek kazâsı kurâsından Mamusa karyesinde mütemekkin teba‘a-i Devlet-i aliyyenin Ermeni milletinden Uncu Agasi v. Karabet v. Atam tarafından ber-vech-i âtî vekâlet iddi‘â eden İstanbul’da Yeşil Direk Değirmeni’nde mukīm teba‘a ve millet-i merkūmeden işbu bâ‘isü’r-rakīm Markusyan Artin Ağa v. Harar zikri âtî değirmen ve dekâkin ve hân hisselerine bi’l-emâne vaz‘-ı yedi mütehakkık olan teba‘a ve millet-i merkūmeden Karnik v. Togofil muvâcehesinde üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan merhûm Hasan Kethudâ Vakfı’na şehriye otuz akçe ve merhûm el-Hâc A‘mâ Vakfı’na şehriye kırk sekiz akçe ve mezkûr el-Hâc A‘mâ Mescid-i şerîfinde imâm olanlara galle ve tevliyeti meşrûta merhûm el-Hâc Kemaleddin Vakfı’na şehriye otuz akçe ve Ayasofya-i kebîr Câmi‘-i şerîfi Vakfı’na şehriye sekiz buçuk akçe icâre-i müeccelelü evkāf-ı mezkûre müsakkafâtından Galata’da Bâbıcisr? dâhilinde sâlifü’z-zikr el-Hâc A‘mâ mahallesinde kâin ma‘lûmü’l-hudûd ve’l-müştemilât bir bâb un değirmeninin evkāf-ı mezkûreden Hasan Kethudâ ve el-Hâc A‘mâ ve Kemaleddin vakıflarından olan mu‘ayyen mahallerinin sülüs ve mezkûr Ayasofya-i kebîr Câmi‘-i şerîfi Vakfı’ndan olan mu‘ayyen mahâllinin sülüs an-sülüs hisseleri ve Hazîne-i Evkāf-ı hümâyûndan mazbût evkāfdan merhûm Kasım Paşa Vakfı müsakkafâtından Galata’ya muzâfe kasaba-i Kasım Paşa’da Câmi‘-i kebîr mahallesinde Hamam-ı atik caddesinde vâki‘ ma‘lûmü’l-hudûd ve’l-müştemilât dört kıt‘a temessüklü şehriye cem‘an iki yüz yirmi altı akçe icâre-i müeccelelü mukaddemâ bir bâb doğramacı dükkânı ve bir bâb değirmen ve el-yevm tahtında kırk beş ve kırk dokuz ve dokuz ve on ve on iki numaralı beş bâb dükkânı müştemil yedi numara ile murakkam bir bâb hanın üç rub‘ hissesi gāib-i merkūm Agasi’nin bâ-temessükât-ı mütevellî bi’l-icâreteyn taht-ı tasarrufunda ve merkūm Karnik hisse-i mezkûrlara gāib-i merkūmun yedinden nez‘ ü kabza ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Şa‘bâni’l-mu‘azzamı’nın on sekizinci ve on dokuzuncu günleri târihleriyle müverraha kazâ-i mezkûr nâibi es-Seyyid Abdüssamed Efendi’nin imzâ ve hâtemlerini hâviye olup mührü mutâbık ve me‘âlleri vekâlet-i mezkûreleri beyândan ibâret idiği cânib-i fetvâhâneden tahşiye ve temhîr olunan iki kıt‘a vekâlet hücceti nâtıka olduğu üzere târih-i mezkûrda nâib-i mûmâ-ileyh huzûrunda şühûd muvâcehelerinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hısas-ı mezkûreden keff-i yed ve bana teslîme merkūm Karnik’e tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hısas-ı mezkûre gāib-i merkūmun bâ-temessükât-ı mütevellî bi’l-icâreteyn taht-ı tasarrufunda olup kendisi dahi bi’l-emâne vâzı‘ü’l-yed olduğunu ikrâr mâ‘adâ müdde‘î-i mekūmun ber-vech-i muharrer vekâlet müdde‘âsını inkâr edicek müdde‘î-i merkūmdan ber-vech-i muharrer vekâlet müdde‘âsına mutâbık beyyine taleb olundukda ahrâr-ı ricâl-i gayr-ı Müslimînden ve karye-i mezkûre ahâlisinden olup bu esnâda Der-aliyye’ye gelen her biri Galata’da Çeşme Meydanı’nda misâfiren sâkinler teba‘a-i Devlet-i aliyyenin Ermeni milletinden Ohannes v. Mangasar [122] v. Tersis ve Serkiz v. Manifos v. Nifos nâm kimesneler li-ecli’ş-şehâde meclis-i şer‘de hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı merkūmân Galata dâhilinde el-Hâc A‘mâ mahallesi imâmı el-Hâc Hafız Eşref Efendi b. Mehmed ve Muhtâr-ı evveli Münir Bey b. Mustafa ve Muhtâr-ı sânî Ahmed Ağa b. Abdullah’dan evvelâ bâ-varaka-i mestûre sırran lede’t-tezkiye makbûlü’ş-şehâde olduklarını mübeyyin mezkûrûn-ı mezbûrûn varaka-i mezkûre zîrini ba‘de’t-temhîr alenen ve dahi Kahveci Mehmed Ağa b. Ali ve her biri teba‘a-i merkūmeden ve Ermeni milletinden ve değirmenci esnâfından Kerob v. Kiragos ve Begos v. Tersis ve diğer Begos v. Matos’dan bi’l-muvâcehe tezkiye olundukda şehâdetleri makbûle olduğu ihbâr olunmağın mûcebince ba‘de’l-hükm hısas-ı mezkûreden keff-i yed ve müdde‘î-i vekîl-i merkūm Artin’e teslîme merkūm Karnik’e tenbîh olunmağın mâ-vaka‘a bi’t-taleb ketb olundu. Fî 7 Rebî‘ülâhir sene 1301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.