Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 246 Hüküm no: 189 Orijinal metin no: [122-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksaray’ın Kazgani Sadi mahallesinden Suriye Kapıkethudası Ali Sırrı Efendi’nin vakfiyesi Aziz Suriye Kapıkethudâsı Ali Sırrı Efendi’nin vakfiyesi El-hamdü lillâhi’llezî e‘azze havâssa ibâdihî bi-sarfi emvâlihim ilâ-envâ‘i’l-hayrât ve e‘ânehim alâ-iktisâbi esnâfi’l-mehâmid ve’l-meberrât ve’s-salâtü ve’s-selâmü alâ-rasûlihî ve nebiyyihî Muhammedün hayri’l-beriyyât ve alâ-âlihî ve ashâbihî ilâ-yevmi yestezillu’l-mer’u tahte’s-sadâkāt. Ammâ ba‘d, işbu vakfiye-i celîlü’ş-şânın ve cerîde-i bedî‘u’l-unvânın tahrîr ü inşâ ve tastîr ü imlâsına bâ‘is ve bâdî oldur ki, mahmiye-i İstanbul’da Aksaray kurbünde Kazganî Sadi mahallesinde sâkin Suriye vilâyeti Kapı Kethudâsı izzetlü Ali Sırrı Efendi b. el-Hâc Numan b. el-Hâc Mehmed zikri âtî vakfına li-ecli’t-tescîl ve’l-itmâm emrü’l-vakf ve’t-tekmîl mütevellî nasb ü ta‘yîn eylediği Cihât Kalemi ketebesinden işbu bâ‘isü’l-kitâb İsmail Mazhar Efendi b. Mehmed Nuri mahzarında ikrâr-ı sahîh-i şer‘î ve i‘tirâf-ı sarîh-i mer‘î edüp etyab-ı mâl ve enfes-i menâlimden ifrâz ve kemâl-i imtiyâz ile mümtâz eylediğim on aded yüzlük mecîdiye altınımı hasbeten lillâhi’l-ehad ve taleben li-merzâti’r-Rabbi’s-Samed vakf-ı sahîh-i şer‘î müebbed ve habs-i sarîh-i mer‘î muhalled ile vakf ve habsedüp şöyle şart ve ta‘yîn eyledim ki, meblağ-ı mezkûr Kuds-i şerîf sancağı dâhilinde Yafa kazâsına tâbi‘ Remle kasabasında rehn-i kavî ve kefîl-i melî veyâhûd ikisinden biri ile bâ-yed-i mütevellî alâ-vechi’l-helâl istirbâh ve istiğlâl olunup hâsıl olan rub‘ nemâsından kasaba-i mezkûrede defîn-i hâk-i ıtır-nâk olan hazret-i Salih en-nebî aleyhi’s-selâtü ve’s-selâm efendimizin türbe-i şerîfelerinde türbedâr olan zâta senevî yüz guruş türbedârlık vazîfesi verile ve senevî elli guruş tevliyet vazîfesi ola ve tevliyet-i mezkûre türbe-i müşârün-ileyhde her gece türbedâr bulunur ise ona meşrûta ola ve mürûr-ı eyyâm ile icrâ-i şerâit-i mezkûreye ri‘âyet müte‘azzire olur ise menâfi‘-i vakf mutlakā fukarâ-i Müslimîne sarf oluna ve vakf-ı mezkûrumun tebdîl ü tağyîr ve taklîl ü teksîr ve tevkīr ve idhâl ü ihrâcı merreten ba‘de uhrâ ve kerreten gıbbe ûlâ yed-i meşiyetimde ola deyü ta‘yîn-i şurût ve tebyîn-i kuyûd birle meblağ-ı mezkûru bundan akdem mütevellî-i mûmâ-ileyhe teslîm eyledikde ol dahi tesellüm ve kabûl ve sâir evkāf mütevellîlerinin tasarrufları misillü tasarruf eyledi dedikde gıbbe’t-tasdîkı’ş-şer‘î emri’l-vakf tamam ve hâl teslîm-i encâm bulmuş iken vâkıf-ı mûmâ-ileyh Ali Sırrı Efendi butlân-ı vakf-ı nukūda ve zımnında olan şurût ve kuyûda ve ba‘dehû kavl-i adem-i lüzûma teşebbüs ile vakf-ı mezkûrundan rücû‘ ve meblağ-ı mezkûru ke’l-evvel mülküne istirdâda şürû‘ ve mütevellî-i mûmâ-ileyh dahi semt-i lüzûmuna zâhib olan eimme-i dîn kavillerime mukābele ederek red ve teslîmden ibâ ve imtinâ‘ birle hâkim-i hâsim ve’l-ecnâb veffakahullâhu te‘âlâ bâ-musaddak ve’s-savâb efendi hazretleri huzûrunda kemâ-hüve’l-mastûr fi’l-kütübi’l-fıkhiyye müterâfi‘ân ve her biri mübtegāsınca fasl ü hasma tâlibân olduklarında hâkim-i müşârün-ileyh dahi âlimen bi’l-hilâfi’l-cârî beyne’l-eimmeti’l-eslâf alâ-kavli men-yerâhu mine’l-eimmeti’l-müctehidîn rıdvânullâhi te‘âlâ aleyhim ecma‘în vakf-ı mezkûrun evvelâ sıhhatine ve sâniyen lüzûmuna ve şurûtunun cevâzına hükm-i sahîh-i şer‘î ve kazâ-i sarîh-i mer‘î etmeğin vakf-ı mezkûr sahîh ve lâzım olup min-ba‘d nakz ü ibtâli muhâl ve tebdîl ü tağyîri vâkıf-ı mûmâ-ileyhden gayra adîmü’l-ihtimâl oldu. Cerâ zâlike ve hurrire fi’l-yevmi’r-râbi‘ aşer min-Cumâdelâhire li-sene ihdâ ve selâse mi’e ve elf. Şühûdü’l-hâl: Muhzırbaşı Ömer Ağa b. Abdulkadir, Tebe‘adan Ömer Ağa b. Hafız Ahmed, Mahmudpaşa Mahkemesi ketebesinden Hafız İsmail Efendi b. Şeyh Salih, Muhzır Mehmed Ağa b. Mustafa ve gayruhum.