Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 247 Hüküm no: 190 Orijinal metin no: [123-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Hamdi Efendi’nin kızına kalan berber dükkânı âletlerinin satılmasına izin verilmesi Hayri, izin: 1 kıt‘a Numara: 438, 7,5 guruş Mahmiye-i İstanbul’da Mercan Ağa mahallesinde sâkin iken bundan akdem vefât eden Ahmed Hamdi Efendi b. <<İsmail’in>> İsmail Hakkı’nın sulbiye sagīre kızı Makbule Hanım’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı Matba‘a-i Osmaniye Muhâsebecisi rif‘atlü Hayri Efendi b. Ahmed ve Evkāf-ı hümâyûn hademesinden Hüseyin Ağa b. İbrahim ta‘rîfleriyle mu‘arrefe olan işbu bâ‘isetü’l-kitâb Saliha Lütfiye Hanım bt. Yahya bi’l-vesâye takrîr-i kelâm edüp mahmiye-i mezbûrede Çenberlitaş civârında Elçi Hanı denmekle ma‘rûf hân derûnunda vâki‘ bir bâb berber dükkânında müstakar cennet-mekân Sultan Mahmud Hân-ı sânî -tâbe serâhû- hazretleri evkāf-ı celîleleri müstegallâtından gedik ta‘bîr olunur iki kıt‘a temessükle yevmî iki akçe icâre-i müeccelelü âlât-ı lâzıme-i ma‘lûmenin otuz iki sehm i‘tibârıyla iki sehm hisse-i şâyi‘ası vâlidesi müteveffât Fatıma Hanım intikālinden müteveffâ-yı mezbûr ile hemşîresi Âişe Hanım’ın münâsafeten bi’l-icâreteyn iştirâken ve şâyi‘an tasarruflarında iken mezbûr Ahmed Hamdi Efendi’nin vefâtıyla bir sehm hisse-i şâyi‘a-i mezkûresi sagīre-i mezbûreye hasbe’l-âde intikāl edüp lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin bir sehm hisse-i mezkûresini bedel-i misliyle bâ-re’y-i mütevellî âhara ferâğa ve bedelini ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi tarafından i‘tâ olunan memhûr bir kıt‘a ilmühaber mantûkunca sagīre-i mezbûrenin bir sehm âlât-ı gedik-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 19 Cemâziyelâhir sene [1]301 Şühûdü’l-hâl: (°)