Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 248 Hüküm no: 191 Orijinal metin no: [123-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zibâ Hanım’ın Plevne’deki Hüseyin Ağa b. Veli Vakfı’nın tevliyetine Mahmud Bey’i vekil tayin ettiği Aziz, nasb-ı vekîl Numara: 416, 40 guruş Mahmiye-i İstanbul’da Hırka-i şerîf kurbünde Akseki mahallesinde mahalle-i mezkûre imâmı Ahmed Efendi’nin hânesinde müstecireten sâkine müteveffâ Ömer Yaşar Bey zevcesi olup zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan bâ‘isü’l-kitâb Zibâ Hanım bt. el-Hâc Mehmed b. Salih takrîr-i kelâm ve ta‘bîr ani’l-merâm edüp Tuna vilâyeti dâhilinde Plevne kazâsı kurâsından Lasnika? karyesinde vâki‘ müstesnâ evkāfdan Gāzi Mihal Bey evlâdından müteveffâ Hüseyin Ağa b. Veli Vakfı’nın meşrûtiyet üzere tevliyeti her biri kebîr olarak bi’n-nefs edâ-i hizmete iktidâr kesbedinceye değin tarafından ben umûr-ı vakfı kāimmakāmlık vechile idâre etmek üzere sadrî sagīr oğlum ola ve zükûr-ı akrabâ-i vâkıfdan Mehmed ve Ahmed ve Osman’a bundan akdem tevcîh olunarak bâ-berât-ı âlî iştirâken uhdelerinde olup ancak ben bir müddetden beri Der-aliyye’de sâkine olduğumdan vakf-ı mezkûrun mahâllinde bi’l-cümle umûr ve husûsâtını idâre ve rü’yete ve müsakkafât ve müstegallâtından vukū‘ bulan ferâğ ve intikālâtını istimâ‘ ve temessükâtını temhîre ve tevliyete âid a‘şârını lâzım gelenlerden ahz ü kabza ve mazbûtunu evlâdım sıgār-ı mûmâ-ileyhim için bana irsâl ve îsâle ve sâl be-sâl muhâsebesini rü’yete ve vakf-ı mezkûrdan dolayı bir gûne da‘vâ vukū‘ bulur ise lâzım gelenler ile bidâyeten ve istînâfen ve temyîzen terâfu‘ ve husûmet ve reddü cevâba ve husûs-ı mezkûr mütevakkıf olduğu umûrun küllîsine tarafımdan bi’l-vesâye ve bi’l-kıyâme Plevne’de mukīm eşrâf hânedânından rif‘atlü Mahmud Bey b. Mehmed Bey’i kabûlüne mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn eyledim deyü hatm-i kelâm etmeğin mâ-vaka‘a bi’t-taleb ketb olundu. Fî 28 Cemâziyelâhir sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri, Aguş Ağa b. Ali, mahalle-i mezkûre imâmı Ahmed Efendi b. el-Hâc Mehmed ve gayruhum.