Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 249 Hüküm no: 192 Orijinal metin no: [124-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Haci Agop’un ölümüyle kızlarına kalan arsanın satılmasına izin verilmesi Kādızâde, izin: 1 kıt‘a Numara: 414, harcı: 10 guruş Medîne-i Üsküdar’a tâbi‘ Kādı karyesinde sâkin iken bundan akdem fevt olan teba‘a-i Devlet-i aliyyenin Ermeni milletinden Kahveci Haci Agop v. Haci Karabet v. Atam’ın sulbiye sagīre kızı Ancele’nin anası ve tesviye-i umûruna bâ-hüccet-i şer‘iye vasîyy-i mansûbesi şahsı Mevlevîhâne kapısı hâricinde Merkez Efendi mahallesinde sâkin adliye hademesinden Abdurrahman Ağa b. Mehmed b. Abdullah ve Davud Paşa civârında Seyyid Hanife mahallesinde sâkin Evkāf-ı Beytü’l-mâl hademesinden Hüseyin Ağa b. Mehmed b. İbrahim ta‘rîfleriyle mu‘arrefe olan işbu hâmilü’r-rakīm Pironiye bt. Kigork bi’l-vesâye takrîr-i kelâm edüp cennet-mekân firdevs-âşiyân Gāzi Sultan Mahmud Hân-ı sânî -tâbe serâhû- hazretleri evkāf-ı celîleleri mülhakātından Câmi‘-i Enderûn Vakfı müsakkafâtından karye-i mezkûrede Moda caddesinde vâki‘ yüz on dört numara ile murakkam ma‘lûmü’l-hudûd şehriye elli akçe icâre-i müeccelelü bir kıt‘a muhterik menzil arsası müteveffâ-yı merkūmun sağlığında bâ-temessük-i mütevellî bi’l-icâreteyn taht-ı tasarrufunda olup ba‘de fevtihî sagīre-i merkūme ile sulbî kebîr oğulları Boznatar ve Kaldos ve Merkel ve sulbiye kebîre kızı Melke’ye hasbe’l-âde ihmâsen intikāl edüp lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı devr-i ezmine ile telef ve zâyi‘ olacağı zâhir ve bedîdâr olup ol-vechile bekāsı sagīre-i merkūme hakkında muzır ve gayr-ı müfîd olduğundan mâ‘adâ sagīre-i merkūmenin nafaka ve kisveye kemâl-i zarûreti olmağla sagīre-i merkūmenin arsa-i mezkûrede olan hisse-i şâyi‘a-i mezkûresi bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i merkūme hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Salim Efendi ile Onuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīre-i merkūmenin arsa-i mezkûrede olan hums hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin guruş mukābelesinde bâ-re’y-i mütevellî âhara ferâğa izin taleb şüd. Fî 28 Cemâziyelâhir sene [1]301 Şühûdü’l-hâl: (°)