Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 250 Hüküm no: 193 Orijinal metin no: [124-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babalarının vefatı sebebiyle Ârifi Camii Vakfı tevliyetinin oğulları Süleyman Bahri ve İzzet Bey’e tevcihi Aziz, nasb-ı vekîl: 1 kıt‘a Numara: 450, harcı: 40 guruş Husûs-ı âti’l-beyânın mahâllinde ketb ü tahrîri içün savb-ı şer‘-i enverden me’zûnen ta‘yîn ve irsâl olunan Kâtib es-Seyyid Mahmud Aziz Efendi İstanbul’da Kadırga Limanı kurbünde Bostânî Ali mahallesinde vâki‘ Rumeli beylerbeyiliği pâyelülerinden sa‘âdetlü Süleyman Bahri Paşa hazretlerinin konaklarına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm etdikde bâ‘is-i müşârün-ileyh Süleyman Bahri hazretleri b. el-merhûm Hurşid Bey b. Yusuf Paşa takrîr-i kelâm ve ta‘bîr ani’l-merâm edüp Muş sancağı ümerâsından merhûm Alâaddin Bey b. Kasım Ağa nâm sâhibü’l-hayrın nefs-i Muş kasabasında binâ eylediği Câmi‘-i Ârifî Vakfı’nın evlâdiyet ve meşrûtiyet üzere tevliyetine bâ-berât-ı âlî mutasarrıf olan mûmâ-ileyh Hurşid Bey b. Yusuf Paşa’nın bundan akdem vefâtı vukū‘uyla tevliyet-i mezkûre mahlûle olup benimle li-ebeveyn birâderim kasaba-i mezkûrede sâkin izzetlü İzzet Bey aslah ve erşed evlâd-ı evlâd-ı evlâd-ı vâkıfdan olarak tevliyet-i mezkûrenin hasran meşrûtün-lehi olduğumuz cihetle tevliyet-i mezkûrenin pederimiz müteveffâ-yı mûmâ-ileyhin mahlûlünden benimle birâderim mûmâ-ileyh İzzet Bey uhdesine meşrûtiyet üzere seviyyen tevcîh olunmak üzere mahâllinden lâzım gelen i‘lâm ve mazbata ve inhâsının istihsâline ve tevliyet-i mezkûrenin uhdemize tevcîhine mahâllinde bir gûne müdâhale edenler olur ise onlarla dahi terâfu‘ ve husûmet ve reddü cevâba ve husûs-ı mezkûr mütevakkıf olduğu umûrun küllîsine tarafımdan birâderim mûmâ-ileyh İzzet Bey’i gıyâbımda kabûlüne mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn eyledim dedikde vâki‘-i hâli kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 28 Cumâdelâhire sene [1]301 Şühûdü’l-hâl: Mehmed Emin Ağa b. Mustafa, Süleyman Efendi b. Ali, Adliye memûrlarından Rıza Efendi b. Şefkati, Mektûbî-i hâriciye hulefâsından Celaleddin Bey b. Tâhir ve gayruhum.