Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 251 Hüküm no: 194 Orijinal metin no: [125-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazif Efendi’nin vefatıyla küçük oğluna kalan ev ve arsanın satılmasına izin verilmesi Küçük Hakkı, izin: kıt‘a Numara: 415, 6 guruş Medîne-i Üsküdar’da Süleyman Ağa mahallesinde sâkin iken bundan akdem vefât eden Nazif Efendi b. el-müteveffâ Mehmed Ârif b. Emin’in sulbî sagīr oğlu Ali’nin li-ebeveyn ammi ve tesviye-i umûruna bâ-hüccet-i şer‘iye vasîyy-i mansûbu işbu bâ‘isü’l-kitâb Mustafa Efendi bi’l-vesâye takrîr-i kelâm edüp ashâb-ı hayrâtdan merhûm Hamza Çelebi Vakfı müsakkafâtından mahalle-i mezkûrede on dört numara ile murakkam ma‘lûmü’l-hudûd ve’l-müştemilât şehriye altmış akçe icâre-i müeccelelü bir bâb menzilin nısf hisse-i şâyi‘ası ve el-Hâc Mehmed Kethudâ Vakfı müsakkafâtından yine mahalle-i mezbûrede kâin on altı numara ile murakkam ma‘lûmü’l-hudûd ve’l-müştemilât şehriye on beş akçe icâre-i müeccelelü bir bâb menzil arsası müstakıllen babamız müteveffâ Mehmed Ârif Ağa b. Mehmed Emin’in hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî benimle karındaşım müteveffâ-yı sânî mezbûr Nazif Efendi ve diğer karındaşlarım Hüsnü Efendi ve Mediha Vahide Hanım’a hasbe’l-âde irbâ‘an ba‘de’l-intikāl karındaşımız mezbûr Nazif Efendi’nin dahi fevtiyle nısf hisse menzil ve müstakil arsa-i mezkûrelerde olan rub‘ hisse-i şâyi‘ası sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olup ve arsa-i mezkûre bî-hâsıl ve etrâfını muhît taş duvarları münhedim olup enkāzı mürûr-ı ezmine ile telef ve zâyi‘ olacağı zâhir ve bedîdâr ve ol-vechile bekāları sagīr-i mezbûr hakkında her vechile muzır ve gayr-ı müfîd olduğundan mâ‘adâ sagīr-i mezbûrun dahi nafaka ve kisveye kemâl -i zarûreti olmağla sagīr-i mezbûrun nısf hisse menzil ve müstakil arsa-i mezkûrelerde olan rub‘ hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca hisse-i mezkûreler bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla cem‘an bin yirmi beş guruş mukābelesinde âhara ferâğa izin taleb şüd. Fî 7 Receb sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.