Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 252 Hüküm no: 196 Orijinal metin no: [125-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Habib Efendi’nin dükkânlardaki hisselerini satması için Mehmed Ârif Efendi’yi vekil tayini Cemal, isbât-ı vekâlet: 1 kıt‘a Numara: 387, 40 guruş Mahmiye-i İstanbul’da Sultan Ahmed Han Câmi‘-i şerîfi kurbünde Firuzağa mahallesinde kırâathâne fevkınde bir bâb odada sâkin Mehmed Habib Efendi b. el-müteveffâ Mahmud Râif b. Abdulkadir kırâathâne-i mezkûre mutasarrıfı işbu bâ‘isü’l-kitâb Mehmed Ârif Efendi b. Mehmed Emin b. Ömer mahzarında ikrâr ve takrîr-i kelâm edüp Haremeyn-i muhteremeyn Hazînesi’nden mazbût Ayasofya-i kebîr Câmi‘-i şerîfi müsakkafâtından mahmiye-i mezbûrede Sultan Bâyezid civârında Parmakkapı nâm mahâlde vâki‘ on iki ve on dört numara ile murakkam ayda yüz otuz beş akçe icâre-i müeccelelü boyacı ve tahtında eskici dükkânlarından ayda on iki akçe bir buçuk pul icâre-i müeccelelü hissesinden ayda dört akçe bir pul icâre-i müeccelelü hissesi babam müteveffâ-yı mezbûr Mehmed Râif Efendi intikālinden benim ve mâ‘adâ ayda sekiz akçe yarım pul icâre-i müeccelelü hissesi dahi vâlidem olup el-yevm mahrûse-i Selanik’de Kalimerakapısı? nâm mahâlde sâkine Cemile Hanım bt. Abdullah b. Abdurrahman’ın bâ-temessük-i mütevellî bi’l-icâreteyn şâyi‘an taht-ı tasarrufumuzda olduğu hâlde Mahkeme-i Teftîş’in İkinci İsbât-ı Vekâlet Cerîdesi’nin üçüncü sahîfesinde muharrer olan zabtı mûcebince vâlidem gāibe-i mezbûrenin ber-vech-i muharrer mutasarrıfe olduğu sekiz akçe yarım pul icâre-i müeccelelü hissesini bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve îcâb eder ise tarafımdan âharı tevkîle mezûn olarak vekâlet-i mutlaka-i sahîha-i şer‘iye ile vekîl olduğumda hükm-i şer‘î lâhık oldukdan sonra ben ber-vech-i muharrer intikālen mutasarrıf olduğum hisse-i şâyi‘a-i mezkûrum ile vâlidem mezbûrenin mutasarrıfe olduğu hisse-i şâyi‘a-i mezkûresi yirmi aded lira-yı Osmânî bedel mukābelesinde Parmakkapı’da sâkin haffâf esnâfından el-Hâc Mehmed Ali Ağa’ya [126] bâ-re’y-i mütevellî ferâğını mukāvele ve bedel-i merkūmu yedinden kabz edüp ancak ben bu def‘a li-ecli’l-maslaha mahrûse-i mezbûreye âzim olmamla hisse-i mezkûreleri bedel-i makbûz-ı merkūm mukābelesinde gāib-i mezbûr el-Hâc Mehmed Ali Ağa’ya kat‘iyyen ferâğını memûru huzûrunda takrîre ve husûs-ı mezkûr mütevakkıf olduğu umûrun küllîsine tarafımdan bi’l-asâle ve bi’l-vekâle mûmâ-ileyh Mehmed Ârif Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl etmeğin mâ-vaka‘a bi’t-taleb ketb olundu. Fî 5 C sene [1]301 Şühûdü’l-hâl: Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.