Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 253 Hüküm no: 197 Orijinal metin no: [126-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi’nin vefatıyla çocuklarına kalan evin satılmasına izin verilmesi Hüsnü, izin: 1 kıt‘a Numara: 480, 32 guruş Cennet-mekân Sultan Selim Hân-ı sâlis -tâbe serâhû- hazretlerinin evkāf-ı şerîfeleri müsakkafâtından medîne-i Üsküdar’da vâkıf-ı müşârün-ileyhin ismine mensûb mahâlde bir bâb menzilde sâkin iken bundan akdem vefât eden Enderûn-ı hümâyûndan mahrec el-Hâc Osman Efendi b. Abdulkadir’in sulbî sagīr oğulları Mehmed Naim ve Mehmed Sami’nin vâlideleri ve tesviye-i umûrlarına bâ-hüccet-i şer‘iye vasîyy-i mansûbeleri olup zâtı Bîcân Efendi b. Hasan b. Ahmed ve Nuri Efendi b. Mehmed Cemal b. Abdulkadir nâm kimesneler ta‘rîfleriyle mu‘arrefe olan işbu bâ‘isü’l-vesîka Hadice Atıye Hanım bt. Abdullah bi’l-vesâye takrîr-i kelâm edüp vakf-ı müşârün-ileyh vakfı müsakkafâtından mahalle-i mezkûrede Hamam caddesinde kâin dört numara ile murakkam ma‘lûmü’l-hudûd ve’l-müştemilât şehriye yüz kırk akçe icâre-i müeccelelü bir bâb menzil vâlidesi olup kendüden evvel vefât eden Naime Hanım bt. Abdullah intikālinden hayatında müteveffâ-yı mezbûr ile li-ebeveyn karındaşı Mehmed Cemal Efendi’nin âdiyen bi’l-icâreteyn münâsafeten iştirâen ve şâyi‘an taht-ı tasarrufunda olduğu hâlde mezbûr el-Hâc Osman Efendi’nin dahi vefâtıyla menzil-i mezkûrda olan nısf hisse-i şâyi‘ası sagīrân-ı mezbûrân ile sulbî kebîr oğlu Ahmed Nüzhet Efendi ve sulbiye kebîre kızı Fatıma Ra‘nâ Hanım’a hasbe’l-âde irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi kemâl-i zarûretleri olmağla sagīrân-ı mezbûrânın menzil-i mezkûrda olan rub‘ hisse-i şâyi‘aları bedel-i misliyle bâ-re’y-i mütevellî âhara ferâğa ve bedeli ahz ü kabz ve müteveffâ-yı mezbûrun Teftîş-i Evkāf Mahkemesi’nden tahrîr olunan terekesi defter-i kassâmı zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile evlâ olduğuna binâen işbu yedimde olup Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan rub‘ hisse-i şâyi‘a-i mezkûreyi bundan akdem lede’l-müzâyede ve ba‘de’l-keşf el-yevm bedel-i misli idiği mütahakkık olan lira-yı Osmânî yüz guruş hesâbıyla altı bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî-gurreti Receb sene [1]301 Şühûdü’l-hâl: Nuri Efendi b. Numan, Bîcân Efendi b. Hasan ve gayruhum.