Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 254 Hüküm no: 198 Orijinal metin no: [126-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bulgar Dafez’in sahibi olduğu ve emaneten Haçik’in elinde bulunan bostan ve gedik âletlerinin vekâleti sebebiyle İstako’ya verilmesi Cevad?, isbât-ı vekâlet: 1 kıt‘a Numara: 476, 40 guruş Manastır vilâyetinde Resne nâhiyesine tâbi‘ Lahçe karyesinde sâkine Devlet-i aliyye teba‘asının Bulgar milleti nisvânından Dafez nâm-ı diğer Vaşo bt. el-müteveffâ Yuvan v. Hıristo tarafından ber-vech-i âtî vekâlet iddi‘â eden teba‘a-i merkūmenin millet-i merkūmesinden işbu bâ‘isü’r-rakīm Bağçivan İstako v. Nagom v. Metro zikri âtî gedik âlâtı hissesine bi’l-emâne vâzı‘ü’l-yed olan teba‘a-i merkūmenin Ermeni milletinden Haçik v. Debon v. Karabet muvâcehesinde üzerine da‘vâ ve takrîr-i kelâm edüp medîne-i hazret-i Ebî Eyyûb el-Ensârî -raziye anhü’l-Bârî- mahallâtından Ali Paşa-yı Cedîd mahallesinde Kurukavak caddesinde kırk iki numara ile murakkam ma‘lûmü’l-hudûd bir bâb bostan ve derûnunda mevcûde hudâvendigâr-ı esbak cennet-mekân Gāzi Sultan Mahmud Hân-ı sânî -tâbe serâhû- hazretleri evkāf-ı celîleleri müstegallâtından gedik ta‘bîr olunur yevmî sekiz akçe icâre-i müeccelelü âlât-ı lâzıme-i ma‘lûmenin yedi sehm i‘tibârıyla iki ve sülüs an-rub‘ sehm hissesinin sülüs hissesi babası müteveffâ-yı merkūm Yuvan intikālinden gāibe-i merkūme ile li-ebeveyn kız karındaşı İlenfe’nin münâsafeten âdiyen bi’l-icâreteyn taht-ı tasarruflarında ve merkūm Haçik hisse-i gedik-i mezkûrdan gāibe-i merkūmenin nısf hissesine teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer intikālen mutasarrıfe olduğu hisse-i mezkûresini bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cumâdelûlâsının yirminci günü târihiyle müverraha medîne-i Manastır nâibi Yunus Zühdü Efendi tarafından nâhiye-i mezkûre nâibi Hafız Yusuf Efendi’nin imzâ ve hâtemini hâviye nâib-i mûmâ-ileyh Yunus Zühdü Efendi’nin tasdîki hâvî imzâ ve temhîr edüp fetvâhâneden tatbîk ve tasdîk buyurulan bir kıt‘a vekâlet hücceti mantûkunca nâhiye-i mezkûre mahkemesinde şühûd mahzarında tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i [127] mezkûreyi kabûl etmemle suâl olunup hisse-i mezkûreden keff-i yed ve bana teslîme merkūm Haçik’e tenbîh olunmak bi’l-vekâle murâdımdır dedikde gıbbe’s-suâl ol dahi cevâbında hisse-i mezkûre gāibe-i merkūmenin ber-vech-i muharrer intikāl-i âdîye binâen tasarrufunda olup kendisi dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr edicek müdde‘î-i merkūmdan ber-vech-i muharrer müdde‘âsına mutâbık beyyine taleb olundukda ahrâr-ı ricâl-i gayriMüslimînden teba‘a-i merkūmenin Bulgar milletinden Bağçevân Aşonko v. Yorgi ve Nasço v. Ostan nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe edâ-yı şehâdet-i şer‘iye etdiklerinde şâhidân-ı merkūmân Eyüb bağçevân esnâfı tahsîldârı el-Hâc Mehmed Emin Efendi b. el-Hâc İbrahim ve esnâf-ı mezkûre Bulgar milleti muhtârı Yorgi v. Gorostan v. Atam ve Ustabaşı Kosti v. Nikoli v. Yorgi ve Aleko v. Metro v. Üstüyan’dan evvelâ bâ-varaka-i mestûre sırran tezkiye olundukda şâhidân-ı merkūmânın makbûlü’ş-şehâde idiklerini mübeyyin mezkûre-i mezbûrûn zeyl-i varaka-i mezkûreyi ba‘de’t-temhîr alenen dahi Usta Yuvan v. Nikoli v. Maço ve Usta Yorgi v. Nikoli v. Atam ve Usta Taşo v. Yuvan v. Üstüyan’dan bi’l-muvâcehe lede’t-tezkiye şehâdetleri makbûle olduğu ihbâr olunmağın mûcebince ba‘de’l-hükm hisse-i âlât-ı gedik-i mezkûrdan keff-i yed ve vekîl-i merkūm İstako’ya teslîme merkūm Haçik’e tenbîh olunmağın mâ-vaka‘a bi’t-taleb ketb olundu. Fî 28 Receb sene [1]301 Şühûdü’l-hâl: (°)