Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 256 Hüküm no: 199 Orijinal metin no: [127-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adeviye Hanım’a ait olup emaneten Hüseyin’in elinde bulunan evin vekâleti sebebiyle Salih Efendi’ye verilmesi İbrahim, isbât-ı vekâlet Numara: 465, 40 guruş Selanik vilâyet-i celîlesi dâhilinde Karaferye kazâsında sâkine kazâ-i mezkûr kāimmakāmı Mustafa Hulusi Efendi zevcesi Adeviye Hanım bt. Ömer b. Abdullah tarafından ber-vech-i âtî vekâlet iddi‘â eden işbu bâ‘isü’l-kitâb Aşçılar Kethudâsı el-Hâc Salih Efendi’nin mahdûmu Mustafa Efendi meclisde zikri âtî menzile bi’l-emâne vaz‘-ı yedi mütehakkık olan Asâkir-i Bahriye cerrâh kolağalarından Hüseyin Bey b. Mehmed muvâcehesinde üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan Vâlide Sultan kethudâsı merhûm Ahmed Efendi’nin Üsküdar’da İnadiye mahallesinde binâ eyledikleri çeşmesi vakfı müsakkafâtından mahmiye-i İstanbul’da Kırkçeşme kurbünde Firuzağa mahallesinde kâin ma‘lûmü’l-hudûd ve’l-müştemilât şehriye kırk beş akçe icâre-i müeccelelü elli altı numara ile murakkam bir bâb menzil gāibe-i merkūmenin bâ-sened-i hâkānî bi’l-icâreteyn taht-ı tasarrufunda ve mûmâ-ileyh Hüseyin Bey menzil-i mezkûra gāibe-i mezbûrenin teslîmiyle bi’l-emâne vâzı‘ü’l-yed olup ancak gāibe-i mezbûre ber-vech-i muharrer mutasarrıfe olduğu menzil-i mezkûru merkūmun yedinden nez‘ birle ahz ü kabz ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cemâziyelevvel sene 12 târihiyle müverraha ve kazâ-i mezkûr nâibi Ali el-Murtaza Efendi’nin imzâ ve hâtemini hâviye ve hâmişinde muharrer kazâ-i mezkûr Bidâyet Mahkemesi’nin mazbatası mantûklarınca târih-i mezkûrda kazâ-i mezkûr Bidâyet Mahkemesi’nde nâib-i mûmâ-ileyh huzûrunda beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup menzil-i mezkûrdan keff-i yed ve bana teslîme mûmâ-ileyh Hüseyin Bey’e tenbîh olunmak bi’l-vekâle matlûbumdur dedikde gıbbe’s-suâl mûmâ-ileyh Hüseyin Bey dahi cevâbında menzil-i mezkûra gāibe-i mezbûrenin taht-ı tasarrufunda olup kendisi dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i mezbûrun vekâlet müdde‘âsını inkâr etmekle hüccet ve mazbata-i mezkûreler mutâbık olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâneden tahşiye ve temhîr olunduğu ve me‘âli müdde‘î-i mezbûrun takrîr-i meşrûhuna muvâfık ve mazbata-i mezkûre dahi hüccet-i mezkûreyi müeyyid ve musaddık olarak tezvîr ve tasnî‘den sâlim olduğu münfehim ve Mecelle-i Ahkâm-ı Adliyye’nin bin sekiz yüz yirmi birinci mâddesi hükmünce bu misillü tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince ba‘de’l-hükm menzil-i mezkûrdan keff-i yed ve müdde‘î-i vekîl-i mezbûr Mustafa Efendi’ye teslîme mûmâ-ileyh Hüseyin Bey’e tenbîh olunmağın mâ-vaka‘a bi’t-taleb ketb olundu. Fî 23 Receb sene [1]301 Şühûdü’l-hâl: Muhzır Ömer Ağa b. Kadri, Muhzır Mehmed Ağa b. Mustafa ve gayruhum.