Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 257 Hüküm no: 200 Orijinal metin no: [128-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Halid Efendi’den kızına kalan sahilhanenin satılmasına izin verilmesi Kādızâde, izin: 1 kıt‘a Medîne-i hazret-i Ebî Eyyûb el-Ensârî -raziye anhü’l-Bârî- mahallâtından Abdülvedud mahallesinde sâkin iken bundan akdem vefât eden Mehmed Halid Efendi b. İsmail Hakkı’nın sulbiye sagīre kızı Fatiş’in? vâlidesi ve tesviye-i umûruna bâ-hüccet-i şer‘iye vasîyy-i mansûbesi işbu bâ‘isetü’l-kitâb Âişe Reftar Hanım bt. Abdullah tarafından vekîl-i müseccel-i şer‘îsi Sadeddin Efendi b. Abdurrahman bi’l-vekâle takrîr-i kelâm edüp Nezâret-i Haremeyn-i muhteremeynden makbûz evkāfdan Sultan Osman Han -tâbe serâhû- hazretleri vakfı müsakkafâtından mahalle-i mezbûrede Yalı sokağında vâki‘ iki numara ile murakkam ma‘lûmü’l-hudûd ve’l-müştemilât şehriye yetmiş sekiz akçe üç pul icâre-i müeccelelü bir bâb sâhilhâne müteveffâ-yı mezbûrun hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihî sagīre-i mezbûre ile diğer sagīre kızı Fatıma’ya hasbe’l-âde münâsafeten intikāl edüp ve mezbûre Fatıma dahi mu‘ahharan bilâ-veled fevt ve nısf hisse sâhilhâne-i mezkûre mahlûl ve cânib-i vakfa âid ve râci‘ olmağla lâkin sâhilhâne-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye eşedd-i ihtiyâcı olmağla sagīre-i mezbûrenin sâhilhâne-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre kādîsı fazîletlü Halil Esedî Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bin guruş mukābelesinde âhara ferâğa izin taleb şüd. Fî 3 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.