Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 258 Hüküm no: 201 Orijinal metin no: [128-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya’nın ölümüyle çocuklarına kalan evin satılmasına izin verilmesi İbrahim, izin: 1 kıt‘a Numara: 426, 12,5 guruş Mahmiye-i İstanbul’da Balat kapısı dâhilinde el-Hâc İsa mahallesinde sâkin iken bundan akdem fevt olan teba‘a-i Devlet-i aliyyenin Ermeni milletinden Ağya v. Marad’ın sulbî sagīr oğlu Lodine ve sulbiye sagīre kızı Ahavin’in anaları ve tesviye-i emirlerine bâ-hüccet-i şer‘iye vasîyy-i mansûbeleri teba‘a ve millet-i merkūme nisvânından şahsı her biri mahalle-i mezbûrede sâkinler teba‘a ve millet-i merkūmeden Berber Tuka v. Parsih v. Agop ve Melkon v. Mardıros v. Melkon ta‘rîfleriyle mu‘arrefe bâ‘isetü’l-vesîka Vasilike bt. Mardıros bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan vezîriâ‘zam-ı esbak merhûm Şehîd Mehmed Paşa Vakfı müsakkafâtından mahalle-i mezbûrede Yenicadde’de bir numara ile murakkam ma‘lûmü’l-hudûd ve’l-müştemilât şehriye yirmi akçe icâre-i müeccelelü bir bâb anası olup kendüden evvel fevt olan Hamamcı Murad zevcesi Mariçe bt. Artin intikālinden müteveffâ-yı merkūm ile li-ebeveyn karındaşı Mardıros’un âdiyen bi’l-icâreteyn münâsafeten iştirâken ve şâyi‘an tasarrufunda iken merkūm Ağya’nın fevtiyle menzil-i mezkûrda olan nısf hisse-i şâyi‘ası sagīrân-ı mezbûrâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i [harâb] olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın nısf hisse menzil-i mezkûru bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrede olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin beş yüz yirmi guruş mukābelesinde âhara ferâğa izin taleb şüd. Fî 4 Receb sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.