Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 259 Hüküm no: 202 Orijinal metin no: [129-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rafet Efendi ve hanımı Münevvere’nin vefatıyla oğullarına kalan evin satılmasına izin verilmesi Mustafa Zihni, izin: 1 kıt‘a Numara: 484, 17,5 guruş Medîne-i Üsküdar’a muzâfe Beylerbeyi’nde Küplüce caddesinde bir bâb menzilde sâkin iken bundan akdem müte‘âkiben vefât eden Şehremâneti Muhâsebe Kalemi Hulefâsı’ndan Rafet Efendi b. Salih ile zevcesi Münevvere Hanım bt. Kadri’nin sulbî sagīr oğulları Mehmed Rüşdü Bey’in min-kıbeli’l-eb ceddi ve velîsi olup mahmûdü’l-hâl idiği ihbâr olunan işbu bâ‘isü’l-kitâb sa‘âdetlü Salih Efendi b. Mehmed Murad bi’l-velâye takrîr-i kelâm edüp Nezâret-i Evkāf-ı hümâyûna mülhak evkāfdan cennet-mekân Sultan Abdülhamid Han -tâbe serâhû- hazretleri evkāf-ı şerîfeleri müsakkafâtından zikr olunan Beylerbeyi’nde Küplüce caddesinde kâin ma‘lûmü’l-hudûd ve’l-müştemilât şehriye elli bir akçe icâre-i müeccelelü bir bâb menzil müteveffiyân-ı mezbûrânın hayatlarında bâ-temessük-i mütevellî bi’l-icâreteyn iştirâken taht-ı tasarruflarında olup ba‘de vefâtihümâ sagīr-i mezbûr ile diğer sulbî sagīr oğulları Kadri’ye hasbe’l-âde münâsafeten ba‘de’l-intikāl sagīr-i mezbûr Kadri’nin dahi mu‘ahharan bilâ-veled fevtiyle nısf hisse-i şâyi‘ası mahlûl ve cânib-i vakf-ı şerîfe âid ve râci‘ olup ancak menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle müteveffiyân-ı mezbûrânın Teftîş-i Evkāf Mahkemesi’nden tahrîr olunan terekeleri defter-i kassâmı zeyline idhâl birle i‘mâl ve istirbâh olunup hâsıl olan nemâsıyla ma‘an hıfz olunmak sagīr-i mezbûr hakkında vücûhla enfa‘ ve evlâ olduğuna binâen işbu yedimde olup Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 11 Receb sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum. Derûn-ı hüccetde bast ü beyân olunduğu üzere veliyy-i mezbûr Salih Efendi sagīr-i mezbûrun nısf hisse menzil-i mezkûrunu bedel-i misli idiği mütehakkık olan lira-yı Osmânî yüz guruş hesâbıyla üç bin beş yüz guruş mukābelesinde ve Muhzır Mehmed Ağa b. Mustafa’ya ol dahi der-akab meblağ-ı merkūm mukābelesinde veliyy-i mezbûra ba‘de’l-ferâğ veliyy-i mezbûr Salih Efendi sagīr-i mezbûrun mâlından ve li-ecli’l-idâne vasî nasb olunan Mehmed Ağa yedinden istidâne ve kabz ve bi’z-zarûre umûruna sarfla istihlâk edüp zimmetinde sagīr-i mezbûra zamanen deyni olan üç bin beş yüz guruş mukābelesinde nısf hisse menzil-i mezkûru sagīr-i mezbûra vefâen ferâğ ve tefvîz edeceğinden ferâğ-ı mezkûrları icrâ ve sened-i hâkānîsi i‘tâ olunmak üzere işbu mahalle şerh verildi. Fî 11 Receb sene [1]301