Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 260 Hüküm no: 203 Orijinal metin no: [129-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamid Efendi Vakfı ve İbrahim Ağa vakıflarının mütevellisi Mehmed Âgâh Efendi’nin, vakıfların muhasebesini gözden geçirmesi için Mustafa Kadem Efendi’yi vekil tayini Âbid Efendi, nasb-ı vekîl: 1 kıt‘a Numara: 498, 40 guruş Nezâret-i Evkāf-ı hümâyûna mülhak evkāfdan Şeyhülislâm merhûm Hamid Efendi Vakfı’nın bi’l-meşrûta ve bâ-berât-ı âlî mütevellîsi izzetlü Mehmed Âgâh Efendi b. el-Hâc Ahmed Nazif b. Mehmed, Mismârî Şücaeddin mahallesinde sâkin işbu bâ‘isü’l-kitâb Mustafa Kadem Efendi b. Ali mahzarında ikrâr ve takrîr-i kelâm edüp vakf-ı müşârün-ileyhin müsakkafât ve müstegallâtının icârât ve vâridât-ı sâiresi tahsîl ile ehl-i mürtezika vezâifini i‘tâdan ve vakf-ı mezkûrun sene be-sene muhâsebesini rü’yetde rehâvet edüp ol-vechile umûr-ı cibâyeti îfâda ihmâl ve tekâsül etmekde olduğundan câbî-i mûmâ-ileyhe rü’yet-i muhâsebe ile mâl-ı icârât ve sâireden zimmetinde zuhûr eden mâl-ı vakf-ı mezbûrdan taleb ve da‘vâ ve ahz ü kabza ve makbûzunu bana def‘ ve teslîme ve husûs-ı mezkûr mütevakkıf olduğu umûrun küllîsine tarafımdan mûmâ-ileyh Mustafa Kadem Efendi’yi vekâlet-i mutlaka-i sahîha-i şer‘iye ile vekîl ve nâib-i menâb nasb ü ta‘yîn eyledim dedikde ol dahi vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 18 Receb sene 1301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Kadri ve gayruhum. Derûn-ı hüccetde ismi mezkûr Mehmed Âgâh Efendi b. el-Hâc Ahmed Nazif bâ-berât-ı âlî ve bi’l-meşrûta mütevellîsi olduğu Beşiktaş’da Sinanpaşa-yı atik mahallesinde vâki‘ el-Hâc İbrahim Ağa Vakfı hakkında dahi mûmâ-ileyh Mustafa Kadem Efendi’yi bi-aynihî [meclis-i] şer‘de vekîl nasb ü ta‘yîn eylediği işbu mahalle şerh verildi. Fî 25 Ra sene [1]301 Muhyiddin