Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 261 Hüküm no: 204 Orijinal metin no: [130-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Maryem’in ölümüyle çocuklarına kalan ev arsası ve ma-i lezizin satılmasına izin verilmesi Nazmi, izin: 1 kıt‘a Numara: 122, 62 guruş Galata’ya muzâfe kasaba-i Beşiktaş’a tâbi‘ Ortaköy’de mütemekkine iken bundan akdem fevt olan teba‘a-i Devlet-i aliyyenin Ermeni milleti nisvânından Maryem bt. Ohannes’in sadrî sagīr oğulları Leon Varşak’ın babaları ve velîleri olup mu‘temedü’l-hâl idiği ihbâr olunan teba‘a ve millet-i merkūm nisvânından işbu bâ‘isü’r-rakīm Avakim v. Asador bi’l-velâye takrîr-i kelâm ve ta‘bîr ani’l-merâm edüp Haremeyn-i muhteremeynden mazbût evkāfdan cennet-mekân Sultan Bâyezid-i Velî Han -tâbe serâhû- hazretleri vakfına senevî elli akçe ve Nezâret-i Evkāf’a mülhak merhûm Kudüsî el-Hâc Mehmed Efendi Vakfı’na şehriye on akçe icâre-i müeccelelü vakfeyn-i mezkûreyn müsakkafâtından zikr olunan Ortaköy’de Palanka sokağında kâin yirmi üç numara ile murakkam ma‘lûmü’l-hudûd bir kıt‘a menzil arsası ve derûnuna cârî cennet-mekân Sultan Mahmud Han hazretleri vakfı müstegallâtından senevî iki buçuk guruş icâre-i müeccelelü kanavât müsennâtına teba‘iyetle nısf masu[ra] mâ-i lezîzden her birinin südüs hisseleri sagīrân-ı merkūmun bâ-senedât-ı hâkānî bi’l-icâreteyn taht-ı tasarruflarında olup lâkin arsa-i mezkûre bî-hâsıl olarak etrâfını muhît duvarları ve mâ-i lezîz-i mezkûrun kanevâtın mürûr-ı eyyâm ile harâb olup ol-vechile bekāları sagīrân haklarında muzır ve gayr-ı müfîd olduğundan mâ‘adâ sagīrân-ı merkūmun nafaka ve kisveye ihtiyâçları olup ben dahi mu‘sir bulunduğumdan sagīrân-ı merkūmânın arsa ve mâ-i lezîz-i mezkûrda olan südüs hisseleri bedel-i misliyle ve mütevellîleri re’yleriyle âhara ferâğa ve bedeli ahz ü kabz ile i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup mahrûse-i mezkûre kādîsı fazîletlü Ahmed Fevzi Efendi ile Dördüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın arsa ve mâ-i lezîz-i mezkûrda olan südüs hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla arsa-i mezkûrede olan hisse-i şâyi‘aları dört bin yüz altmış altı buçuk guruş yirmi akçe ve nısf masura mâ-i lezîz-i mezkûrda olan hisse-i şâyi‘aları sekiz yüz otuz üç guruş kırk akçe ki cem‘an beş bin guruş mukābelesinde âhara ferâğa izin taleb şüd. Fî 29 Receb sene [1]301 Şühûdü’l-hâl: Ömer Ağa b. Kadri, Mehmed Ağa b. Mustafa ve gayruhum.