Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 262 Hüküm no: 205 Orijinal metin no: [130-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Talat Efendi’nin sahibi olduğu arsadaki hisselerinin satılmasına amcası İsmail Hakkı Bey’i vekil tayini Mahmiye-i İstanbul’da Saraçhâne kurbünde Mimâr Ayas mahallesinde sâkin ve zikri âtî arsa hissesinin bi’l-icâreteyn sahîh mutasarrıfı olduğu mahalle-i mezkûre imâm ve muhtârları taraflarından mevrûd bir kıt‘a ilmühaberde beyân olunan Mehmed Talat Efendi b. Esad Bey b. Mustafa Tâhir mahalle-i mezkûrede sâkin ammi işbu bâ‘isü’l-kitâb İsmail Hakkı Bey b. el-mûmâ-ileyh Mustafa Tâhir mahzarında takrîr-i kelâm ve ta‘bîr ani’l-merâm edüp Nezâret-i Haremeyn-i muhteremeyne mülhak evkāfdan medîne-i Üsküdar’a tâbi‘ Çengel karyesinde vâki‘ Abdi Ağazâde merhûme Hadice Hanım Çeşmesi Vakfı müstegallâtından karye-i mezkûrede Yenimahalle’de vâki‘ ma‘lûmü’l-hudûd on iki adadan ibâret terbî‘an on sekiz bin altı yüz iki zirâ‘ iki parmak arsa ceddim Mustafa Tâhir Efendi b. Mehmed Ârif’in uhdesinde iken fevtiyle üç nefer evlâdı babam Esad Bey ve ammim mûmâ-ileyh İsmail Hakkı Bey ve ammetem Zübeyde Aleviye Hanım’a islâsen ba‘de’l-intikāl babam mûmâ-ileyh Esad Bey’in dahi mu‘ahharan vefâtı vukū‘uyla sülüs hissesi benimle li-ebin er karındaşım sagīr Memduh Bey ve li-eb kız karındaşım mürâhıka Sabire Âdile Hanım’a islâsen intikāl edüp ol-vechile arsa-i mezkûrenin tis‘a hisse-i şâyi‘ası benim âdiyen bi’l-icâreteyn taht-ı tasarrufumda olup ancak ben bu esnâda Gelibolu cânibine âzim olmamla arsa-i mezkûreden ber-minvâl-i muharrer mutasarrıf olduğum tis‘a hisse-i şâyi‘amı hissedârımla ma‘an ifrâza ve ba‘de’l-ifrâz hisseme isâbet eden mahalleri Tersâne-i âmire Sergi Müdîriyeti’nden mütekā‘id rif‘atlü İzzet Efendi yedinden makbûzum olan otuz aded lira-yı Osmânî bedel mukābelesinde mûmâ-ileyh İzzet Efendi’ye kat‘iyyen ferâğını mütevellî huzûrunda takrîre ve husûs-ı mezkûr mütevakkıf olduğu umûrun küllîsine tarafımdan ammim mûmâ-ileyh İsmail Hakkı Bey’i vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 12 Receb sene [1]301 Şühûdü’l-hâl: (°)