Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 263 Hüküm no: 206 Orijinal metin no: [131-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Rıza Efendi’den çocuklarına kalan ev ve bahçenin satılmasına izin verilmesi Küçük Aziz, izin: 1 kıt‘a Numara: 502, 75 guruş Mahmiye-i İstanbul’da Koca Mustafa Paşa mahallesinde sâkin iken bundan akdem vefât eden Mehmed Rıza Efendi b. Seyyid İsmail b. el-Hâc İbrahim Edhem’in sulbî sagīr mahdûmu Mehmed Şevket ve sulbiye sagīre kerîmesi Hadice Makbule’nin li-ebeveyn ammileri ve tesviye-i emirlerine bâ-hüccet-i şer‘iye vasîyy-i mansûbları işbu bâ‘isü’l-kitâb es-Seyyid Mehmed Rasim Efendi b. İsmail b. İbrahim Edhem bi’l-vesâye takrîr-i kelâm edüp Nezâret-i Evkāf-ı hümâyûna mülhak evkāfdan Rûznâmçeci-i esbak Elmas Paşa birâderi Mustafa Sadık Bey’in Eyüb ve Bâyezid Câmi‘i hademeleri vazîfelerine zammı vakfı müsakkafâtından Çekmece-i sagīre tâbi‘ Makrihora karyesinde Hafız Ağa Çıkmazı sokağında vâki‘ on numara ile murakkam ma‘lûmü’l-hudûd ve’l-müştemilât şehriye altmış akçe icâre-i müeccelelü bir bâb menzil ma‘a bağçenin nısf hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın hisse-i şâyi‘a-i mezkûreleri bedel-i misliyle bâ-re’y-i mütevellî âhara ferâğ ve bedeli ahz birle i‘mâl ve istirbâh olunup hâsılı olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile kazâ-i mezkûr Belediye Dâiresi tarafından i‘tâ memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil ma‘a bağçe-i mezkûrda olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on beş bin guruş mukābelesinde âhara ferâğa izin taleb şüd. Fî 5 Şa‘bân sene [1]301 Şühûdü’l-hâl: Muhzır Mehmed Ağa b. Mustafa, Muhzır Mehmed Ağa b. Kadri ve gayruhum.