Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 264 Hüküm no: 207 Orijinal metin no: [131-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım bülûğa erdiğinden annesinin emaneten elinde bulundurduğu babasından kalan malların kendisine verilmesi Hilmi, isbât-ı rüşd Husûs-ı âti’l-beyânın mahâllinde ketb ü tahrîri içün savb-ı şer‘-i enverden bi’l-iltimâs me’zûnen bi’l-hükm ta‘yîn ve irsâl olunan Kâtib Hilmi Efendi medîne-i Üsküdar’da Gülfam Hatun mahallesinde Uncular sokağında yirmi beş numara ile murakkam Asâkir-i şâhâne Redif Binbaşılarından Ramazan Ağa’nın sâkin olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî etdikde Beylerbeyi ahâlisinden olup cânib-i Hicaz-ı mağfiret-tırâzda Taif’de sâkin iken bundan akdem vefât eden el-Hâc Behzad Efendi b. Musa’nın sulbiye sagīre kızı olup mahalle-i mezbûre imâmı muhtârları tarafından i‘tâ olunan memhûr bir kıt‘a ilmühaberleri mûcebince el-yevm yirmi yaşını mütecâvize ve bulûğunu mukırra ve mu‘terife olarak ber-vech-i âtî rüşdünü iddi‘â eden zâtı ta‘rîf-i şer‘î ile mu‘arrefe işbu bâ‘isetü’l-kitâb Hadice Hanım vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zikri âtî mâlına vâzı‘atü’l-yed olan kezâlik zâtı ta‘rîf-i şer‘î ile mu‘arrefe Zeyneb Beyhan Hanım bt. Halil b. Ârif mahzarında üzerine da‘vâ ve takrîr-i kelâm edüp hâlâ ben yirmi yaşını mütecâvize olarak âkıle ve bâliğa ve rüşdüm bulûğuma munzama olup umûrumu bi’n-nefs idâre ve rü’yete kādire ve i‘âne-i vasîden müstağniye olmamla ber-mûceb-i defter-i kassâm pederim müteveffâ-yı mezbûrdan mevrûs ve müntakil olup vasîyy-i mezbûrenin vâzı‘ü’l-yed olduğu mâlımı taleb ederim deyü da‘vâ etdikde vasîyy-i mezbûre Zeyneb Beyhan Hanım dahi cevâbında müdde‘iye-i mezbûrenin pederi müteveffâ-yı mezbûrdan mevrûs ve müntakil mâlına bi’l-vesâye vâzı‘atü’l-yed olduğunu tâyi‘aten ikrâr mâ‘adâ müdde‘iye-i mezbûrenin ber-vech-i muharrer rüşd müdde‘âsını inkâr edicek müdde‘iye-i mezbûreden ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve mahalle-i mezbûre ahâlisinden zât-ı mezbûreyi ârifân Mehmed Râşid Efendi b. Mustafa b. Ali ve Çubukçu esnâfından Mustafa Ağa b. es-Seyyid el-Hâc Veliyüddin b. el-Hâc Ömer nâm kimesneler li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka işbu müdde‘iye-i mezbûre Hadice Hanım hâlâ yirmi yaşını mütecâvize olarak âkıle ve bâliğa ve rüşdü bulûğuna munzama olup umûrunu bi’n-nefs rü’yete kādire ve i‘âne-i vasîden müstağniyedir, biz bu husûsa bu vech üzere şâhidiz, şehâdet dahi ederiz deyü her biri müttefikü’l-lafz ve’l-ma‘nâ bi’l-muvâcehe edâ-yı şehâdet-i şer‘iye etdiklerinde şâhidân-ı mezbûrân âdil ve makbûlü’ş-şehâde idiklerini mahalle-i mezbûre imâmı el-Hâc İsmail Hakkı Efendi b. el-Hâc Mehmed Said ve muhtâr-ı evvel Mehmed Emin Ağa b. Mehmed b. Ali ve muhtâr-ı sânî el-Hâc Ahmed Ağa b. Süleyman b. Hasan kâtib-i mûmâ-ileyhin me’zûnen irsâl eylediği mestûreye tahrîr ve temhîr ile evvelâ sırran ve her biri mahalle-i mezkûre ahâlisinden İsmail Efendi b. Ahmed ve el-Hâc Ömer Efendi b. el-Hâc Veli ve Ebûbekir Ağa b. Mustafa ve Bekçi Ali Ağa b. Osman’dan alenen dahi tezkiye olundukda şehâdetleri makbûle olduğu ihbâr olunmağın mûcebince ba‘de’l-hükm müdde‘iye-i mezbûrenin pederi müteveffâ-yı mezbûrdan mevrûs mâlını kendisine teslîme mezbûre Zeyneb Beyhan Hanım’a tenbîh eylediğini kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîri tenfîz olunduğu Teftîş-i Evkāf Mahkemesi Beytü’l-mâl Kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 17 C sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri