Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 265 Hüküm no: 208 Orijinal metin no: [132-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mayaoğlu Satılmış’ın sahibi olduğu evi emaneten elinde bulunduran Ömer Ağa’nın vekâleti sebebiyle Koçoğlu Gazi Bey’e teslim etmesi Küçük Hakkı, isbât-ı vekâlet: 1 kıt‘a Numara: 454, 40 guruş Kengiri sancağında Çerkeş kazâsına muzâfe Karacaviran nâhiyesine tâbi‘ Karacalar karyesinde sâkin Mayaoğlu Satılmış b. Ahmed b. Abdullah tarafından ber-vech-i âtî [vekâlet] iddi‘â eden Der-aliyye’de Bitpazarı’nda mukīm işbu bâ‘isü’l-kitâb Koçoğlu Gāzi Bey b. İbrahim b. Ahmed zikri âtî menzil hissesine bi’l-emâne vaz‘-ı yedi mütehakkık olan Ömer Ağa b. Ali b. Mustafa mahzarında üzerine da‘vâ ve takrîr-i kelâm edüp Evkāf-ı hümâyûn Hazînesi’nden mazbût evkāfdan fâtih-i Mısır Gāzi Sinan Paşa Evkāf-ı şerîfesi müsakkafâtından mahmiye-i İstanbul’da Mahmud Paşa-yı Velî mahallesinde vâki‘ ma‘lûmü’l-hudûd ve’l-müştemilât beher şehr kırk beş akçe icâre-i müeccelelü bir bâb menzilin altı hisse i‘tibârıyla iki buçuk sehm hisse-i şâyi‘ası vâlidesi müteveffât Emine Hanım bt. Ahmed intikālinden gāib-i mezbûrun âdiyen bi’l-icâreteyn taht-ı tasarrufunda olup ve mezbûr Ömer Ağa hisse-i mezkûreye gāib-i mezbûrun teslîmiyle bi’l-emâne vâzı‘ü’l-yed olup ancak gāib-i mezbûr ber-vech-i muharrer mutasarrıf olduğu iki buçuk hisse-i mezkûreyi mezbûrun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzunu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cumâdelâhiresinin on beşinci günü târihiyle müverraha kazâ-i mezkûr nâibi es-Seyyid Ahmed Rifat Efendi’nin imzâ ve hâtemini hâviye olup mührü mutâbık ve me‘âli vekâlet-i mezkûreyi beyândan ibâret idiği ibâresi üç yüz bir senesi Recebi’l-ferd’inin sekizinci günü târihiyle cânib-i fetvâhâneden tasdîk buyurulan bir kıt‘a vekâlet hücceti nâtıka olduğu üzere kazâ-i mezkûr mahkemesinde nâib-i mûmâ-ileyh huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûreden keff-i yed ve bana teslîme mezbûr Ömer Ağa’ya tenbîh olunmak bi’l-vekâle matlûbumdur dedikde ba‘de’s-suâl ol dahi cevâbında hisse-i mezkûre gāib-i mezbûrun ber-vech-i muharrer intikālen tasarrufunda olup kendisi dahi bi’l-emâne vâzı‘ü’l-yed olduğunu tâyi‘an ikrâr ve i‘tirâf edip mâ‘adâ müdde‘î-i mezbûrun vekâlet müdde‘âsını inkâr edicek müdde‘î-i mezbûrdan ber-vech-i muharrer vekâlet müdde‘âsına mutâbık beyyine taleb olundukda ahrâr-ı ricâl-i Müslimînden ve kazâ-i mezkûr ahâlisinden olup bu esnâda Der-aliyye’ye gelen Çarşı-yı kebîrde koltukçu esnâfından Veli oğlu Ali Ağa b. Mustafa b. Veli ve yine esnâf-ı mezkûreden Hüseyin Ağa b. Ali b. Osman nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î mufassalan edâ-yı şehâdet-i şer‘iye etdiklerinde şâhidân-ı mezbûrân Çarşı-yı kebîrde koltukçu esnâfı ustabaşılarından Hacı Mehmed Efendi b. Mustafa b. Ahmed ve Usta Bekir Ağa b. Mehmed b. Sadık ve İbrahim Ağa b. İbrahim b. el-Hâc Ali ve yine esnâf-ı merkūmeden Ali Ağa b. Abdullah b. Mehmed ve esnâf-ı merkūmeden Ahmed Ağa b. Ali b. Halil ve Mehmed Ağa b. Ali b. Mehmed nâm kimesnelerden lede’t-tezkiye adl ve makbûlü’ş-şehâde idikleri zîr-i varakaya tahrîr ve ihbâr olunmağın mûcebince ba‘de’l-hükm iki buçuk hisse menzil-i mezkûrdan keff-i yed ve vekîl-i mezbûr Gāzi Bey’e teslîme mezbûr Ömer Ağa’ya tenbîh olunmağın mâ-vaka‘a bi’t-taleb ketb olundu. Fî 9 Receb sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Kadri ve gayruhum.