Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 266 Hüküm no: 209 Orijinal metin no: [132-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal sahibi olduğu dükkân ve içindeki âletleri emaneten elinde bulunduran Bartek’in, bunları vekâleti sebebiyle Kigork’a teslim etmesi Salih, isbât-ı vekâlet: 1 kıt‘a Numara: (°), 40 guruş Erzurum vilâyeti dâhilinde Erzincan’a tâbi‘ Kuruçay kazâsı kurâsından Armudan-ı kebîr karyesinde sâkin Devlet-i aliyye teba‘asının Ermeni milletinden Mihal v. el-müteveffâ Mardıros v. Kirkor’un li-ebeveyn karındaşı olup tarafından ber-vech-i âtî vekâlet iddi‘â eden işbu bâ‘isü’r-rakīm teba‘a ve millet-i merkūmeden Kigork zikri âtî dükkân ve gedik âlâtı hisselerine bi’l-emâne vaz‘-ı yedi mütehakkık olan Kumkapı Patrikhânesi yazıcılarından ve teba‘a-i Devlet-i aliyyenin millet-i merkūmesinden Bartek v. Ketmon v. Ohannes muvâcehesinde üzerine da‘vâ ve takrîr-i kelâm edüp Haremeyn-i muhteremeyn Hazînesi’nden mazbût evkāfdan Arabacıbaşı Voynuk Şücaeddin Bey Vakfı müsakkafâtından mahmiye-i İstanbul’da Uzun Çarşı kurbünde Mercan Ağa mahallesinde Tığcılar caddesinde Yaldızlı Han karşısında Yolgeçen Hanı derûnunda vâki‘ ma‘lûmü’l-hudûd altmış iki numara ile murakkam ma‘lûmü’l-hudûd beş akçe icâre-i müeccelelü bir bâb aşçı hoşâbcı ve çorbacı dükkânının rub‘ hissesi derûnunda mevcûde cennet-mekân Sultan Mahmud Hân-ı sânî -tâbe serâhû- hazretleri evkāf-ı celîleleri müstegallâtından gedik ta‘bîr olunur yevmî üç akçe icâre-i müeccelelü âlât-ı lâzıme-i ma‘lûmenin dahi yüz yirmi sehm i‘tibârıyla on beş sehm hissesi babam müteveffâ-yı merkūm Mardıros intikālinden benimle karındaşım gāib-i merkūm Mihal ve li-ebeveyn kız karındaşımız karye-i mezkûrede sâkine teba‘a ve millet-i merkūme nisvânında Maryem’in islâsen bi’l-icâreteyn iştirâken ve şâyi‘an taht-ı tasarrufumuzda ve merkūm Bartek rub‘ hisse dükkân ve on beş sehm âlât-ı gedik-i mezkûrlardan karındaşım gāib-i merkūmun sülüs hisselerine teslîmiyle bi’l-emâne vâzı‘ü’l-yed olup ancak karındaşım gāib-i merkūm ber-vech-i muharrer mutasarrıf olduğu hisse-i mezkûrları merkūmun yedinden nez‘ ü kabzına ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cumâdelûlânın beşinci günü târihiyle müverraha kazâ-i mezkûr nâibi es-Seyyid Hafız Halil Fethi Efendi’nin [133] imzâ ve hâtemini hâviye bir kıt‘a vekâlet hücceti ve zahrında muharrer kazâ-i mezkûr Bidâyet Mahkemesi’nin memhûr mazbatası mantûklarında mahkeme-i mezbûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve vech-i lâyıkıyla bana teslîme merkūm Bartek’e tenbîh olunmak murâdımdır dedikde gıbbe’s-suâl merkūm Bartek dahi cevâbında hisse-i şâyi‘a-i mezkûrlar ber-vech-i muharrer gāib-i merkūmun taht-ı tasarrufunda olup kendisi dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr kılındığına ve me‘âli vekîl-i merkūmun takrîr-i meşrûhuna muvâfıkve mazbata-i mezkûre dahi mazmûn-ı hüccet-i mezkûreyi musaddık ve müeyyid bulunduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliyye’nin bin sekiz yüz yirmi birinci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince müdde‘î-i merkūmun vekâletine ba‘de’l-hükm dükkân ve gedik-i mezkûrların hisse-i şâyi‘a-i mezkûrelerinden keff-i yed ve müdde‘î-i vekîl-i merkūm Kigork’a vech-i lâyıkıyla teslîme merkūm Bartek’e tenbîh olunmağın mâ-vaka‘a bi’t-taleb ketb olundu. Fî 3 Şa‘bân sene [1]301 Şühûdü’l-hâl: Mehmed Ağa b. Mustafa, Muhzırbaşı Ömer Ağa b. Kadri ve gayruhum.