Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 268 Hüküm no: 210 Orijinal metin no: [133-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babası vefat eden Hüseyin Hüsnü’ye annesi Fatma Zarife Hanım’ın vasi tayin edildiği Salih, nasb-ı vasî Hazîne-i Evkāf-ı hümâyûndan mazbût cennet-mekân Sultan Selim Hân-ı sâlis -tâbe serâhû- hazretleri evkāf-ı şerîfeleri hudûdu dâhilinde medîne-i Üsküdar’a muzâfe Kādı karyesinde sâkin iken bundan akdem vefât eden Yağcı Sağır İsmail Ağa b. Osman b. Süleyman’ın sulbî sagīr oğlu Hüseyin Hüsnü’nün vakt-i rüşd ve sedâdına değin tesviye-i umûruna bir vasî lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zâtını ârifân hâlâ İstanbul kādısı mu‘âvini mevâlî-i i‘zâmdan fazîletlü Mustafa Efendi b. Ömer Efendi ve Kādı karyesi İskele Câmi‘-i şerîfi imâmı Hafız Hüseyin Efendi b. Mustafa haberleriyle lede’ş-şer‘i’l-enver zâhir ve mütehakkık olan sagīr-i mezbûrun vâlidesi işbu bâ‘isetü’l-kitâb Fatıma Zarife Hanım bt. Musa sagīr-i mezbûrun vakt-i rüşd ve sedâdına değin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğini Evkāf-ı hümâyûn beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 26 Receb sene [1]301 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.